ممبئی، ۔ ٹیم انڈیا اور ممبئی انڈینز (ایم آئی ) کے اسٹار بلے باز روہت شرما ٹی۔20 کرکٹ میں 500 چھکے لگانے والے پہلے ہندوستانی بن گئے ہیں۔روہت نے اتوار کو وانکھیڑے اسٹیڈیم میں چنئی سپر کنگز (سی ایس کے ) کے خلاف انڈین پریمیئر لیگ ( آئی پی ایل ) میچ کے دوران یہ کارنامہ انجام دیا۔
روہت نے میچ میں اپنی بہترین کارکردگی کا مظاہرہ کرتے ہوئے 63 گیندوں میں 105 رن ناٹ آوٹ بنائے۔ ان کی اننگز میں 11 چوکے اور پانچ چھکے شامل تھے۔ ممبئی انڈینز کے سابق کپتان نے یہ رن 166.67 کے اسٹرائیک ریٹ سے بنائے۔
میچ میں لگنے والے 5 چھکوں کے ساتھ ہی روہت کے نام ٹی-20 کرکٹ میں 502 چھکے ہو گئے ہیں۔
ٹی 20 کرکٹ میں سب سے زیادہ چھکے ویسٹ انڈیز کے لیجنڈ کرس گیل (1,056 چھکے) کے ہیں، اس کے بعد ویسٹ انڈیز کے آل راونڈر کیرون پولارڈ (860 چھکے)، آندرے رسل (678 چھکے) اور کولن منرو (548 چھکے) ہیں۔
روہت نے اس آئی پی ایل سیزن کے چھ میچوں میں 52.20 کی اوسط اور ایک سنچری کے ساتھ 167 سے زیادہ کے اسٹرائیک ریٹ سے 261 رن بنائے ہیں۔
میچ کے بارے میں بات کریں تو ممبئی نے ٹاس جیت کر سی ایس کے کو پہلے بلے بازی کا موقع دیا۔
اجنکیا رہانے (5) اور راچن رویندرا (16 گیندوں پر 21 رن، دو چوکے اور ایک چھکا) زیادہ اثر نہیں ڈال سکے، حالانکہ کپتان رتوراج گائیکواڑ (40 گیندوں پر 69 رن، پانچ چوکوں اور پانچ چھکوں) اور شیوم دوبے (38 گیندوں پرناٹ آوٹ 66رن، 10چوکے اور دو چھکے) اور آخر میں ایم ایس دھونی کی دھماکہ خیز اننگز (چار گیندوں میں 20 رن ناٹ آو¿ٹ، تین چھکے) کی بدولت 20 اوورز میں 4 وکٹوں پر 206 رن بنائے۔ ممبئی کی جانب سے ہاردک پانڈیا نے 2، شریس گوپال اور جیرالڈ کوئٹزی نے ایک ایک وکٹ حاصل کی۔
ہدف کا تعاقب کرنے والی ممبئی کی ٹیم نے شاندار آغاز کیا، ایشان کشن (15 گیندوں میں 23 رن، تین چوکے، ایک چھکا) اور روہت شرما نے پہلی وکٹ کے لیے 70 رن جوڑے۔ روہت آئی پی ایل کی دوسری سنچری اسکور کرنے میں کامیاب رہے لیکن تلک ورما (31 رن) کے علاوہ روہت کو کسی اور بلے باز کا تعاون نہیں ملا اور ممبئی کی ٹیم 20 اوور میں 6 وکٹ پر 186 رن ہی بنا سکی اور 20 رن سے میچ ہار گئی۔
سی ایس کے کے لیے متھیشا پاتھیرانا (4/28) بہترین گیند باز رہے۔ مستفیض الرحمان اور تشار دیشپانڈے نے بھی 1-1 وکٹ حاصل کی۔
