جے پور میں بہار کے ایک ہی خاندان کے پانچ افراد کو زندہ جل گئے
جے پور، 21 مارچ ۔ راجستھان کی راجدھانی جے پور کے وشوکرما تھانہ علاقے کے جیسلیا گاوں میں بدھ کی دیر رات ایک گھر میں آگ لگ گئی۔ آگ لگنے سے ایک ہی خاندان کے پانچ افراد جان کی بازی ہار گئے۔ جاں بحق ہونے والوں میں تین بچے اور والدین شامل ہیں۔ یہ لوگ بہار کے مدھوبنی کے رہنے والے تھے۔ یہ خاندان یہاں کرائے کے مکان میں رہتا تھا۔ پولیس نے حادثے کی تصدیق کی ہے۔
اطلاعات کے مطابق کھانا بناتے وقت سلنڈر میں لگی آگ سے پورا خاندان زندہ جل کر ہلاک ہو گیا۔ حادثے میں تین بچوں کی بھی موت ہو گئی۔ پولیس کے مطابق سلنڈر اور چولہا کمرے کے دروازے پر ہی رکھا تھا، اس کی وجہ سے کوئی بھی باہر نہیں نکل سکا۔
اطلاع ملتے ہی فائر بریگیڈ کے عملے نے موقع پر پہنچ کر آگ بجھانے کے بعد لاشوں کو باہر نکالا۔ پولیس نے لاشیں سوائی مان سنگھ اسپتال کے مردہ خانہ میں رکھوا دی ہیں۔ پولیس کے مطابق یہ حادثہ وشوکرما پولیس اسٹیشن کے تحت جیسلیا گاوں میں پیش آیا۔ ایف ایس ایل ٹیم کی مدد سے شواہد اکٹھے کر لیے گئے ہیں۔ کیس کی تفتیش کی جا رہی ہے۔
وزیر اعلیٰ بھجن لال شرما نے اظہار تعزیت کرتے ہوئے ایکس پر لکھا، ’’جے پور کے وشوکرما میں زبردست آگ کی وجہ سے پانچ شہریوں کی بے وقت موت کی خبر دل کو دہلا دینے والی ہے۔ پرمپتا پرماتما سے آنجہانیوں کو اپنے شری چرنوں میں جگہ دینے اور رشتہ داروں کو یہ صدمہ برداشت کرنے کی طاقت دینے اور زخمیوں کے جلد صحت یاب ہونے کی پرارتھنا کرتا ہوں۔‘‘
