فرانسیسی صدر میکرون اور وزیر اعظم مودی آج جے پور پہنچیں گے
جے پور، 25 جنوری (ہ س)۔ وزیر اعظم نریندر مودی اور فرانسیسی صدر ایمانوئل میکرون آج جے پور کا دورہ کریں گے۔ دونوں رہنما شہر میں جنتر منتر، ہوا محل اور البرٹ ہال میوزیم سمیت ثقافتی اور تاریخی اہمیت کے حامل مختلف مقامات کا دورہ کریں گے۔ میکرون 26 جنوری کو دہلی کے کرتویہ پتھ پر منعقد ہونے والی 75ویں یوم جمہوریہ تقریب میں مہمان خصوصی ہوں گے۔ میکرون کا ہندوستان کا دو روزہ دورہ جے پور سے شروع ہوگا۔
طے شدہ شیڈول کے مطابق فرانسیسی صدر میکرون کا طیارہ آج دوپہر 2.30 بجے جے پور ہوائی اڈے پر اترے گا۔ میکرون دوپہر 3:15 بجے آمیر قلعہ کا دورہ کریں گے۔ میکرون تقریباً چھ گھنٹے جے پور میں قیام کرنے والے ہیں۔ میکرون آج رات 08:50 بجے دہلی کے لیے روانہ ہوں گے۔
وزیر اعظم نریندر مودی اپنے طے شدہ شیڈول کے مطابق شام 4:30 بجے جے پور ہوائی اڈے پر پہنچیں گے۔ یہاں سے شام 5 بجے جنتر منتر جائیں گے۔ فرانسیسی صدر میکرون کا شام 5:30 بجے استقبال کریں گے۔ دونوں رہنما شام 6 بجے سے ساڑھے 6 بجے تک روڈ شو میں شرکت کریں گے۔ یہ روڈ شو جنتر منتر سے شروع ہو کر ہوا محل سے ہوتے ہوئے سانگانیری گیٹ تک ہو گا۔ اس کے بعد دونوں رہنما ہوٹل رام باغ پیلس پہنچیں گے۔ شام 6:30 سے 8:30 تک یہاں قیام کرنے کا پروگرام ہے۔ اس دوران دونوں رہنما ہندوستان اور فرانس کے درمیان دو طرفہ تعلقات اور مختلف جغرافیائی سیاسی پیش رفت پر تبادلہ خیال کریں گے۔
وزیر اعظم مودی آج رات 9 بجے جے پور ہوائی اڈے سے دہلی کے لیے روانہ ہوں گے۔ فرانسیسی صدر کو ہوٹل رام باغ میں عشائیہ دیا جائے گا۔ ہوٹل میں اس کے لیے خصوصی تیاریاں کی گئی ہیں۔ یہاں راجستھانی پکوان جیسے دال، باٹی چورما کے ساتھ کیر سانگری کی سبزی، چٹنی، باجرے اور مکئی کی روٹی میکرون کو پیش کی جائیں گی۔
