سڈنی ٹیسٹ : وارنر نے اپنی آخری اننگز میں نصف سنچری اسکور کی، آسٹریلیا نے پاکستان کو 8 وکٹوں سے ہرایا
۔ آسٹریلیا نے تین میچوں کی ٹیسٹ سیریز میں کیا کلین سویپ
سڈنی، 6 جنوری (ہ س)۔ آسٹریلیا نے سڈنی کرکٹ گراونڈ (ایس سی جی) میں کھیلے جا رہے تیسرے ٹیسٹ کے چوتھے روز ہفتہ کو پاکستان کو 8 وکٹوں سے شکست دے کر تین میچوں کی سیریز 3-0 سے جیت لی۔ آسٹریلیا کے سلامی بلے باز ڈیوڈ وارنر نے اپنا آخری ٹیسٹ میچ کھیلتے ہوئے اپنی آخری اننگز میں شاندار نصف سنچری کھیلتے ہوئے 57 رن بنائے۔
پہلی اننگز میں 14 رنوں سے پیچھے رہنے کے بعد آسٹریلیا نے پاکستان کو چوتھے روز صرف 115 رن پر آوٹ کر دیا جس کے بعد آسٹریلوی ٹیم کو جیت کے لیے 130 رن کا ہدف ملا۔
130 رنوں کے ہدف کے تعاقب میں آسٹریلوی ٹیم کا آغاز خراب رہا اور ساجد خان نے پہلے اوور میں ہی عثمان خواجہ (0) کو پویلین بھیج دیا، جب آسٹریلوی ٹیم کا کھاتہ بھی نہیں کھلا تھا۔ اس کے بعد وارنر، جو ٹیسٹ کرکٹ میں اپنی آخری اننگز کھیل رہے تھے، مارنس لابوشین کے ساتھ مل کر دوسری وکٹ کے لیے 119 رن کی سنچری شراکت داری کی۔
جب ٹیم فتح سے 11 رن دور تھی تبھی ساجد خان نے وارنر کو ایل بی ڈبلیو آوٹ کر کے ان کی آخری ٹیسٹ اننگز کا خاتمہ کیا۔ وارنر نے اپنی آخری اننگز میں 75 گیندوں کا سامنا کیا اور 7 چوکوں کی مدد سے 57 رن بنائے۔ وارنر کے آوٹ ہونے کے بعد مارنس لابوشین اورا سٹیو اسمتھ نے مزید کوئی نقصان نہیں ہونے دیا اور ٹیم کو 8 وکٹوں سے فتح سے ہمکنار کرایا۔ لابوشین 62 اور اسمتھ 4 رن بنانے کے بعد ناقابل شکست واپس لوٹے۔
پاکستان کی جانب سے ساجد خان نے دونوں وکٹیں لیں
پاکستان کی دوسری اننگز 115 رنوں پر سمٹ گئی، چار بلے بازوں نے کھاتا نہیں کھولا
دوسری اننگز میں پاکستان کا آغاز خراب رہا اور عبداللہ شفیق (0) اور کپتان شان مسعود صرف 1 رن کے اسکور پر آوٹ ہو گئے۔ شفیق کو اسٹارک نے اور مسعود کو جوش ہیزل ووڈ نے پویلین بھیجا۔ اس کے بعد صائم ایوب اور بابر اعظم نے ٹیم کا اسکور 50 سے آگے بڑھایا۔ 58 کے مجموعی اسکور پر صائم 33 رن بنانے کے بعد ناتھن لیون کی گیند پر ایل بی ڈبلیو آوٹ ہو گئے۔ اس کے فوراً بعد بابر اعظم بھی 60 کے مجموعی اسکور پر 23 رن بنا کر ٹریوس ہیڈ کا شکار بن گئے۔
بابر کے آوٹ ہونے کے بعد سعود شکیل (02)، ساجد خان (00) اور آغا سلمان (00) کو ایک ہی اوور میں 67 کے مجموعی اسکور پر ہیزل ووڈ نے پویلین بھیج دیا۔ اس کے بعد رضوان اور جمال نے ٹیم کا اسکور 100 سے آگے بڑھایا۔ تاہم 109 کے اسکور پر ناتھن لیون نے رضوان (28) کو پویلین بھیج کر پاکستان کو دوہرا جھٹکا دیا اور اسی سکور پر پیٹ کمنز نے جمال (18) کو پویلین بھیج دیا۔ 115 کے مجموعی اسکور پر لیون نے حسن علی (05) کو بولڈ کر کے پاکستان کی اننگز کا خاتمہ کر دیا۔ میر حمزہ 1 رن بنانے کے بعد ناٹ آوٹ لوٹے۔
آسٹریلیا کی جانب سے جوش ہیزل ووڈ نے 4، ناتھن لیون نے 3، پیٹ کمنز، مچل اسٹارک اور ٹریوس ہیڈ نے 1-1 وکٹ حاصل کی۔
آسٹریلیا کی پہلی اننگز 299 رن تک محدود رہی، پاکستان کو 14 رن کی برتری حاصل ہوئی۔
اس سے قبل آسٹریلیا کی پہلی اننگز 299 رنوں پر سمٹ گئی۔ آسٹریلیا کی جانب سے مارنس لابوشین (60) اور مچل مورش (54) نے شاندار نصف سنچریاں بنائیں۔ ان دونوں کے علاوہ ایلکس کیری (38)، اسٹیو اسمتھ (38)، عثمان خواجہ (47) اور ڈیوڈ وارنر (34) نے بھی مفید اننگز کھیلی۔
پاکستان کی جانب سے عامر جمال نے 6، آغا سلمان نے 2، ساجد خان اور میر حمزہ نے 1-1 وکٹ حاصل کی۔
پاکستان نے اپنی پہلی اننگز میں 313 رن بنائے، تین بلے بازوں نے نصف سنچریاں اسکور کیں۔
اس سے قبل میچ میں پاکستان نے ٹاس جیت کر پہلے بلے بازی کا فیصلہ کیا۔ پاکستان نے اپنی پہلی اننگز میں وکٹ کیپر بلے باز محمد رضوان (88)، ٹیل بلے باز عامر جمال (82) اور آغا سلمان (53) کی شاندار نصف سنچریوں کی بدولت 313 رن بنائے۔
آسٹریلیا کی جانب سے کپتان پیٹ کمنز نے 5، مچل اسٹارک نے 2 اور جوش ہیزل ووڈ، ناتھن لیون اور مچل مورش نے ایک ایک وکٹ حاصل کی۔
ہندوستھان سماچار
/شہزاد
