وزیر اعظم مودی آج بھگوان شری رام کے شہر ایودھیا میں
نئی دہلی، 30 دسمبر (ہ س)۔ وزیر اعظم نریندر مودی آج بھگوان شری رام کے شہر ایودھیا پہنچ رہے ہیں۔ وہ ایودھیا میں شہری سہولیات کی بہتری اور عالمی معیار کے بنیادی ڈھانچے کی ترقی کے لیے 11,100 کروڑ روپے سے زیادہ کے ترقیاتی پروجیکٹوں کا افتتاح اور سنگ بنیاد رکھیں گے۔ اہم پروگراموں میں ایودھیا ہوائی اڈے اور ملحقہ شری رام مندر کے فن تعمیر کو ظاہر کرنے والی ٹرمینل عمارت کے اگلے حصے کا افتتاح اور ایودھیادھام جنکشن ریلوے اسٹیشن کا افتتاح شامل ہے۔ یہ اطلاع پی آئی بی کے جاری کردہ اعلامیہ میں دی گئی ہے۔
پی آئی بی کی ایک ریلیز کے مطابق وزیر اعظم دو نئی امرت بھارت ٹرینوں کو ہری جھنڈی دکھائیں گے۔ اس کے ساتھ ہی ملک میں امرت بھارت ٹرینوں کا آپریشن شروع ہو جائے گا۔ وہ چھ نئی وندے بھارت ٹرینوں کو ہری جھنڈی دکھائیں گے۔ وزیر اعظم ملحقہ شری رام مندر تک رسائی بڑھانے کے لیے چار نئی ترقی یافتہ، چوڑی اور خوبصورت سڑکوں کا افتتاح کریں گے۔
وزیر اعظم مودی ایودھیا دھام میں 2180 کروڑ روپے سے زیادہ کی لاگت سے تیار کیے جانے والے گرین فیلڈ ٹاون شپ پروجیکٹ کا سنگ بنیاد رکھیں گے۔ اس کے علاوہ وہ اتر پردیش میں 4600 کروڑ روپے سے زیادہ کے مختلف دیگر اہم پروجیکٹوں کا افتتاح اور نقاب کشائی کریں گے۔
وزیر اعظم نریندر مودی نے جمعہ کو اپنے ایکس ہینڈل پر خوشی کا اظہار کرتے ہوئے لکھا، ’’بھگوان شری رام کے شہر ایودھیا میں عالمی سطح کے انفرااسٹرکچر کی ترقی، کنیکٹیوٹی کو بہتر بنانے اور یہاں کی خوشحال وراثت کو محفوظ رکھنے کے لیے ہماری حکومت پرعزم ہے۔ اس سمت میں میں کل نئے تعمیر شدہ ہوائی اڈے اور ری ڈیولپڈ ریلوے اسٹیشن کا افتتاح کروں گا‘‘۔
اس کے ساتھ ساتھ مجھے کئی اور ترقیاتی منصوبوں کا افتتاح اور سنگ بنیاد رکھنے کی سعادت بھی ملے گی، جس سے ایودھیا اور یوپی سمیت ملک کے کئی علاقوں میں میرے خاندان کے افراد کی زندگی آسان ہو جائے گی۔ وزیر اعظم آج صبح تقریباً 11:15 بجے ایودھیا ریلوے اسٹیشن کا سب سے پہلے افتتاح کریں گے اور نئی امرت بھارت ٹرینوں اور وندے بھارت ٹرینوں کو ہری جھنڈی دکھا کر روانہ کریں گے۔
ہندوستھان سماچار
/شہزاد
