بس میں لگی آگ، 13 افراد زندہ جلے، 16 جھلس گئے
گنا، 28 دسمبر (ہ س)۔ ضلع کے بجرنگ گڑھ تھانہ علاقے میں دوہائی مندر کے نزدیک بدھ کی رات ایک بس میں ڈمپر سے ٹکرانے کے بعد آگ لگنے سے 12 افراد زندہ جل گئے۔ آگ لگنے سے ڈمپر کا ڈرائیور بھی جاں بحق ہو گیا۔ ضلع انتظامیہ نے اس کی تصدیق کی ہے۔ حادثے میں تقریباً 16 افراد جھلس گئے، جنہیں ضلع اسپتال میں داخل کرایا گیا ہے۔
جانکاری کے مطابق بدھ کی رات آٹھ بجے سکروار ٹریول کی بس گنا سے آرون جا رہی تھی۔ 32 سیٹر بس میں 35-30 مسافر سوار تھے۔ یہ حادثہ آرون روڈ پر بجرنگ گڑھ میں دوہائی مندر کے قریب رات 8.30 بجے کے قریب پیش آیا۔ موقع پر موجود لوگوں نے بتایا کہ بس اور ڈمپر کے درمیان تصادم کے بعد بس الٹ گئی اور آگ لگ گئی۔ کچھ ہی دیر میں آگ نے پوری بس کو اپنی زد میں لے لیا۔ حادثے کے بعد موقع پر کہرام مچ گیا۔
کئی مسافروں نے بس کے دروازوں اور کھڑکیوں سے چھلانگ لگا کر اپنی جان بچائی۔ لوگوں نے پولیس کو اطلاع دی۔ کچھ دیر بعد پولیس اور فائر بریگیڈ کی گاڑیاں موقع پر پہنچ گئیں لیکن تب تک پوری بس آگ کی زد میں آ چکی تھی۔
حادثے کی اطلاع ملتے ہی موقع پر لوگوں کی بھیڑ جمع ہوگئی۔ پولیس نے موقع پر موجود لوگوں کی مدد سے بس میں پھنسے لوگوں کو نکالنے کی کوشش کی تاہم بس میں آگ اتنی تیزی سے پھیلی کہ کچھ لوگوں کو باہر نکلنے کا موقع ہی نہیں دیا۔ اطلاع ملتے ہی گنا کلکٹر ترون راٹھی اور پولیس سپرنٹنڈنٹ وجے کھتری بھی موقع پر پہنچ گئے اور زخمیوں کو ایمبولینس اور دیگر گاڑیوں کے ذریعے ضلع اسپتال پہنچایا۔
حادثے کی خوفناکی کا اندازہ اس بات سے لگایا جا سکتا ہے کہ لاش کو اٹھاتے وقت جسم کے اعضا الگ ہوکرگررہے تھے۔ حادثے میں کل 13 افراد ہلاک ہوئے ہیں۔ بس کے اندر سے جو لاشیں نکالی گئیں، ان میں سے سات ایک دوسرے سے چپکی ہوئی تھیں۔ ملازمین کے ہاتھ باہر نکالتے ہوئے بھی کانپ رہے تھے۔ لاشیں اس طرح جلی ہوئی تھیں کہ ان کی شناخت مشکل ہے۔
پولیس سپرنٹنڈنٹ وجے کھتری نے بتایا کہ بدھ کی رات تقریباً 8.30 بجے بجرنگ گڑھ تھانہ علاقے میں ایک بس میں آگ لگنے کا واقعہ پیش آیا، جس میں کئی لوگ شدید طور پر جھلس گئے۔ بس میں سوار 16 افراد کو تشویشناک حالت میں ضلع اسپتال لایا گیا ہے۔ اس کے ساتھ ہی جلنے سے 13 لوگوں کی موت ہو گئی ہے۔ لاشوں کو نکال کر پوسٹ مارٹم کے لیے اسپتال پہنچادیا گیا ہے۔ آگ لگنے سے بس مکمل طور پر تباہ ہو گئی۔ پولیس معاملے کی جانچ کر رہی ہے۔
وزیر اعلیٰ ڈاکٹر موہن یادو نے بس حادثے کی تحقیقات کا حکم دیا ہے۔ انہوں نے محکمہ ٹرانسپورٹ کے افسران کو ہدایت دی ہے کہ وہ اس بات کو یقینی بنائیں کہ ایسے حادثات دوبارہ نہ ہوں۔ وزیراعلیٰ نے ضلع انتظامیہ کو بس حادثے میں جاں بحق ہونے والوں کے لواحقین کو فی کس 4 لاکھ روپے اور زخمیوں کو 50 ہزار روپے کی امداد فراہم کرنے کی ہدایت کی ہے۔
گنا کلکٹر ترون راٹھی نے بتایا کہ گنا آرون روڈ پر ڈمپر اور بس کے درمیان تصادم کی وجہ سے بس میں آگ لگ گئی۔ مزید تفتیش جاری ہے۔ مرنے والوں کی شناخت نہیں ہو سکی ہے۔ اسپتال میں داخل کئی افراد کی حالت تشویشناک ہے۔ ہماری ترجیح لاشوں کو برآمد کرنا اور زخمیوں کا علاج ہے۔
ہندوستھان سماچار
/شہزاد
