پٹنہ، 19 نومبر(ہ س)۔ بہار کے جموئی ضلع کے گڑھی تھانہ میں تعینات سب انسپکٹر پربھات رنجن قتل معاملہ کا اہم ملزم ریت مافیا کرشنا روی داس ابھی تک مفرور ہے اور اس کے خاندان کے افراد سلاخوں کے پیچھے جارہے ہیں۔ اب انسپکٹر قتل معاملے کے اہم ملزم مفرور کرشنا روی داس کی اہلیہ چنتا دیوی کو بھی پولیس نے عدالتی حراست میں بھیج دیا ہے۔ چنتا دیوی 2 ماہ کی بچی کو گود میں لے کر عدالتی تحویل میں جیل گئی۔ اس سے قبل فرار چل رہے کرشنا کے والد دشرتھ داس ، ماں جھولیا دیوی اور بھانجہ پون داس کو جیل بھیجا جا چکا ہے۔
جیل جانے سے قبل ڈیڑھ ماہ کی بچی کو گود میں لیے چنتا دیوی نے اپنے مفرور شوہر کرشنا روی داس سے عدالت کے احاطے میں خودسپردگی کی درخواست کی ہے۔ اہلیہ نے اپنے شوہر سے درخواست کی کہ وہ تینوں بیٹیوں اور خاندان کے افراد کو پریشانی کا باعث نہ بنیں اور درخواست کر تے ہوئے کہا کہ وہ جہاں بھی ہیں لو ٹ آئے۔ آج ان کے ماں باپ اور بھانجہ جیل میں ہیں ، اب وہ اپنی ڈیڑھ ماہ کی بیٹی کے ساتھ جیل جا رہی ہے۔ کرشنا کی بیوی بار بار اپنے شوہر سے خودسپردگی کی درخواست کر رہی تھی۔ وہ یہ بھی کہہ رہی تھی کہ پولیس اس کے ساتھ کچھ نہیں کرے گی ، وہ خودسپر دگی کر کے اپنے خاندان کو تباہ ہونے سے بچالے۔
واضح ہو کہ گزشتہ منگل کے روزغیر قانونی ریت کانکنی کو لیکر کار روائی کرنے گئے گڑھی تھانہ کے سب انسپکٹر پربھات رنجن کو ٹر یکٹر سے کچل کر ہلاک کر دیا تھا ۔ سب انسپکٹر قتل معاملے میں کرشنا روی داس، جو نوادہ ضلع کے کواکول تھانہ علاقے کے محلی ٹنڈ گاؤں کے رہنے والے ہیں۔ وہ اہم ملزم ہے ، واقعہ کے بعد سے مفرور ہے۔ اس معاملے میں پولیس نے پہلے نامزد ملزمین متھیلیش ٹھاکر اور پون داس کو گرفتار کر کے جیل بھیج دیا تھا، پھر بعد میں واقعہ سے متعلق سازش کے الزام میں مفرور کرشنا روی داس کے والد اور والدہ کو عدالتی حراست میں بھیج دیا گیا تھا ۔ اور بعد میں کرشنا کی اہلیہ کو بھی عدالتی حراست میں بھیج دیا گیا۔ پولیس اس واقعہ کو انجام دینے والے کرشنا روی داس کی گرفتاری کے لیے مسلسل چھاپہ ماری کر رہی ہے۔
اس معاملے میں سرکل انسپکٹر سی پی یادو نے بتایا کہ مفرور کرشنا روی داس کی بیوی کو سب انسپکٹر پربھات رنجن کے قتل میں سازش کے الزام میں عدالتی حراست میں بھیج دیا گیا ہے۔ ادھر گڑھی تھانہ انچارج امریش کمار نے بتایا کہ اب تک اس قتل معاملے میں کل پانچ لوگوں کو گرفتار کر کے جیل بھیج دیا گیا ہے ، مفرور کرشنا روی داس کی گرفتاری کے لیے کارروائی جاری ہے۔
ہندوستھان سماچار/ افضل/سلام
