غزہ،17نومبر(ہ س)۔
ایک اسرائیلی فوجی عہدیدار نے بتایا ہے کہ اسرائیلی سپیشل فورسز نے غزہ کے شفاءہسپتال کی ہر عمارت اور ہر منزل کی تلاشی لی۔ سینکڑوں مریض اور طلبہ عملہ کمپلیکس میں موجود ہیں۔ رائٹرز کے مطابق صہیونی عہدیدار نے نام ظاہر نہ کرنے کی استدعا کرتے ہوئے مزید کہا کہ آپریشن کی بنیاد ایک دہشت گرد انفراسٹرکچر کی موجودگی کے بارے میں ہمارے خیال پر رکھی گئی ہے۔
شفا ہسپتال میں حماس کے ہتھیار اور آلات ملے ہیں۔ حماس نے غزہ کے ہسپتالوں میں بنیادی ڈھانچے کو چھپانے اور شواہد کو چھپانے کے لیے مسلسل کام کیا ہے۔ دوسری طرف حماس نے ان الزامات کی تردید کردی ہے۔ صہیونی فوج کے عہدیدار نے یہ دعویٰ بھی کیا ہے کہ شفا ہسپتال کے کمپیوٹر سے حماس کے زیر حراست افراد سے متعلق ویڈیو کلپس ملے ہیں۔عہدیدار نے ایک بیان میں کہا کہ یہ فوٹیج حماس سے تعلق رکھنے والی ڈیوائسز سے ملی ہے۔ انہوں نے کہا اسرائیلی فورسز شفا ہسپتال کمپلیکس کی تلاشی لی رہی ہیں۔ یہ کمپلیکس کئی عمارتوں پر مشتمل ہے۔ ا±دھر حماس رہنما اسامہ حمدان نے جمعرات کو کہا کہ حماس اقوام متحدہ اور بین الاقوامی اداروں سے مطالبہ کر رہی ہے کہ وہ ہسپتالوں کی حقیقت کا جائزہ لینے اور اسرائیل کی دروغ گوئی پر مبنی بے سرو پا باتوں کو جانچنے کے لیے ایک بین الاقوامی تحقیقاتی کمیٹی تشکیل دیں۔
اسامہ حمدان نے شفا ہسپتال میں کی گئی جارحیت کے جرم میں امریکہ کو براہ راست ذمہ دار بھی ٹھہرایا۔ انہوں نے کہا کہ ہسپتالوں، بیکریوں کو نشانہ بنانے اور پانی کی ترسیل کو روکنے سے اسرائیل کا مقصد ہمارے لوگوں کو بے گھر کرنے کے منصوبے کو عملی جامہ پہنانا ہے۔ انہوں نے بتایا کہ اسرائیل نے غزہ کے 35 میں سے 25 ہسپتالوں کی سروسز کو معطل کردیا ہے۔دوسری طرف ہیومن رائٹس واچ نے کہا ہے کہ اسرائیل کی جانب سے اسلحہ کی تصاویر شائع کی گئی ہیں جن میں کہا گیا ہے کہ فوجیوں کو یہ اسلحہ شفا ہسپتال کے اندر سے ملا ہے۔ یہ تصاویر جنگی قوانین کے تحت ہسپتالوں کے تحفظ کی حیثیت کو روندنے کی اجازت دینے کے لیے کافی نہیں ہیں۔
ہندوستھان سماچار
