حیدرآباد، 13 نومبر (ہ س)۔ تلنگانہ کی راجدھانی حیدرآباد کے نامپلی بازار گھاٹ میں آج صبح تقریباً 9.30 بجے آگ لگنے سے 9 افراد ہلاک ہوگئے۔ ان میں دو خواتین بھی شامل ہیں۔ مرنے والوں میں سات افراد کا تعلق محمد اعظم کے خاندان سے ہے۔ آگ کی لپیٹ میں آنے والے آٹھ افراد شدید جھلس گئے ہیں۔ ان تمام کو اسپتال لے جایا گیا ہے۔ پولیس نے اس کی تصدیق کی ہے۔
پولیس کے مطابق اطلاع ملتے ہی فائر فائٹرز 6 گاڑیوں کے ساتھ پہنچے اور آگ پر قابو پالیا۔ راحت اور بچاؤ کاموں میں جی ایچ ایم سی اور این ڈی آر ایف کے اہلکاروں نے بھی اہم رول ادا کیا۔ڈائریکٹر جنرل آف پولیس- فائر ڈپارٹمنٹ ناگی ریڈی نے جائے وقوعہ کا معائنہ کرنے کے بعد بتایا کہ اپارٹمنٹ کے گراؤنڈ فلور پر ایک گیراج ہے جو آگ کی لپیٹ میں آگیا۔ . آگ اس وقت لگی جب وہاں کار کی مرمت کی جارہی تھی۔ ڈیزل اور کیمیکل کے ڈرم وہاں رکھے گئے تھے۔ جس کی وجہ سے آگ تیزی سے پھیل گئی۔
انہوں نے بتایا کہ کچھ ہی دیر میں آگ اپارٹمنٹ کی بالائی منزل تک پھیل گئی۔ کچھ خاندان تیسری اور چوتھی منزل پر کرائے پر رہتے ہیں۔ اس حادثے میں دھوئیں کی وجہ سے تین افراد کا دم گھٹ گیا۔ باقی پانچ افراد جھلس کر ہلاک ہو گئے۔ تمام زخمیوں کو حیدرآباد کے عثمانیہ سرکاری اسپتال میں داخل کرایا گیا ہے۔ پولیس نے مقدمہ درج کر کے تفتیش شروع کر دی ہے۔
ہندوستھان سماچار
