اساتذہ تقرری بدعنوانی معاملے میں ای ڈی آج دوبارہ ابھیشیک بنرجی سے پوچھ گچھ کرے گی
کولکاتا، 9 نومبر (ہ س)۔ مغربی بنگال کے مشہور اساتذہ تقرری بدعنوانی معاملے میں منی لانڈرنگ کی جانچ کر رہی انفورسمنٹ ڈائریکٹوریٹ (ای ڈی) آج جمعرات کو وزیر اعلیٰ ممتا بنرجی کے بھتیجے اور ترنمول کانگریس کے رکن پارلیمنٹ ابھیشیک بنرجی سے پوچھ گچھ کرے گی۔ ترنمول کے قومی جنرل سکریٹری ابھیشیک بنرجی کو 9 نومبر کو صبح 11 بجے کولکاتا سے متصل آئی ٹی سٹی سالٹ لیک میں سی جی او کمپلیکس میں واقع مرکزی ایجنسی کے علاقائی ہیڈکوارٹر میں حاضر ہونے کے لیے کہا گیا ہے۔
مغربی بنگال کی خواتین و اطفال بہبود وزیر اور پارٹی ترجمان ششی پانجا نے بدھ کو کہا کہ ابھیشیک بنرجی جمعرات کو ای ڈی کے سامنے پیش ہوں گے۔ انہوں نے الزام عائد کیا کہ ابھیشیک بنرجی ‘انتقام کی سیاست کا شکار ہو گئے ہیں‘‘۔ انہوں نے یہ بھی الزام لگایا کہ بی جے پی اگلے سال ہونے والے لوک سبھا انتخابات سے قبل اپنے اپوزیشن لیڈروں کو ہراساں کرنے کے لیے ایسی انتقامی سیاست کر رہی ہے۔
تاہم بی جے پی کی مغربی بنگال یونٹ کے ترجمان شمک بھٹاچاریہ نے کہا، ’’پارٹی انتقامی سیاست پر یقین نہیں رکھتی ہے۔‘ انہوں نے کہا، ’’مرکزی ایجنسی عدالت کی نگرانی میں تحقیقات کر رہی ہے، اگر ترنمول کو کوئی مسئلہ ہے تو وہ عدالت سے رجوع کر سکتی ہے۔‘‘
قابل ذکر ہے کہ سوجے کرشنا بھدر عرف ’’کالی گھاٹ والے کاکو‘‘ کو اساتذہ تقرری بدعنوانی کے معاملے میں گرفتار کیا گیا ہے۔ وہ لپس اینڈ باؤنس نامی کمپنی میں کام کرتا تھا اور دعویٰ کیا گیا تھا کہ اس کمپنی کے ذریعے اساتذہ کی تقرری میں بڑی رقم کی کرپشن کی گئی۔ اس کمپنی کے ڈائریکٹر کوئی اور نہیں بلکہ ابھیشیک بنرجی ہیں، ان کے والد امت بنرجی اور والدہ لتا بنرجی بھی کمپنی کے ان افسران میں شامل ہیں، جنہیں ای ڈی نے پہلے اکتوبر کے مہینے میں نوٹس بھیجا تھا، لیکن ان دونوں پوچھ گچھ کے لیے حاضر نہیں ہوئے تھے۔
ہندوستھان سماچار
/شہزاد
