چھتیس گڑھ: پہلے مرحلے کی 20 سیٹوں پر ووٹنگ جاری، سکما میں آئی ای ڈی دھماکے میں سی آر پی ایف جوان زخمی
۔ سیکورٹی کے سخت انتظامات، ایک لاکھ سیکورٹی اہلکاروں کی تعیناتی
رائے پور/سکما، 7 نومبر ۔ چھتیس گڑھ اسمبلی انتخابات کے پہلے مرحلے کی ووٹنگ کے دوران سکما ضلع کے کونٹ اسمبلی حلقہ میں نکسلیوں کے ذریعہ نصب کردہ آئی ای ڈی کی زد میں آکر سی آر پی ایف کا ایک جوان زخمی ہوگیا اور اسے اسپتال میں داخل کرایا گیا ہے۔
پہلے مرحلے میں ریاست کی 20 سیٹوں پر ووٹنگ ہو رہی ہے، جس میں 10 سیٹوں پر صبح 7 بجے اور 10 سیٹوں پر صبح 8 بجے ووٹنگ شروع ہو گئی ہے۔ ووٹنگ کے بائیکاٹ اور نکسلی دھمکیوں کے پیش نظر سیکورٹی کے وسیع انتظامات کئے گئے ہیں۔
ایس پی کرن چوہان کے مطابق منگل کی صبح ووٹنگ کی حفاظت کے لیے کوبرا 206 اور سی آر پی ایف کے اہلکار کیمپ تونڈمارکا سے ایریا ڈومنیشن مہم میں ایلماگنڈا گاوں کی طرف گئے تھے۔ گشت کے دوران کوبرا 206 کے سپاہی انسپکٹر شریکانت کا پاؤں نکسلیوں کی طرف سے نصب آئی ای ڈی پر پڑنے سے دھماکہ ہوا۔ زخمی جوان کو ابتدائی طبی امداد دی جارہی ہے اور اس کی حالت خطرے سے باہر ہے۔
ادھر پہلے مرحلے میں 90 اسمبلی سیٹوں والےچھتیس گڑھ اسمبلی انتخابات کے لیے 20 سیٹوں پر ووٹنگ کا عمل جاری ہے۔ ان 20 نشستوں کے لیے 223 امیدوار میدان میں ہیں اور 40,78,681 ووٹرز اپنا حق رائے دہی استعمال کریں گے۔ انتہائی حساس بستر ڈویژن سمیت تمام 20 پولنگ سیٹوں پر سیکورٹی کے سخت انتظامات کئے گئے ہیں۔ جس میں ایک لاکھ سکیورٹی اہلکار تعینات کیے گئے ہیں۔ باقی 70 سیٹوں پر دوسرے مرحلے میں 17 نومبر کو ووٹ ڈالے جائیں گے۔
