غزہ،06 نومبر(ہ س)۔
اردن کی فضائیہ نے اپنے جنگی طیاروں کے ذریعے غزہ کے زیر محاصرہ ہسپتالوں میں طبی ضرورتوں سے متعلق سامان ‘ ڈراپ ‘ کیا ہے۔ اس طبی سامان میں ادویات اور طبی آلات وغیرہ شامل تھے۔
اردن کے شاہ عبداللہ دوم نے یہ بات پیر کے روز صبح سویرے کہی ہے۔ شاہ عبداللہ نے اپنے ٹویٹر اکاؤنٹ سے بتایا ہے ‘ ہماری بے خوف فضائیہ نے نصف شب کو فوری طبی امداد ڈراپ کی ، یہ طبی ضرورتوں کا سامان غزہ میں اردن کے ڈاکٹروں کے قائم کردہ فیلڈ ہسپتال میں ‘ڈراپ’ کیا گیا ہے۔ شاہ نے مزید کہا ‘یہ ہمارا فرض ہے کہ ہم اپنے زخمی بھائیوں اور بہنوں کی مدد کریں۔ ہم اپنے فلسطینی بھائیوں کی مدد کے لیے ہمیشہ موجود رہیں گے۔’
واضح رہے اردن کے جنگی طیاروں کو طبی امداد فراہم کرنے والی ایمبولینسز کا انداز دینے کا فیصلہ امریکی وزیر خارجہ انٹونی بلینکن کی طرف سے ‘میڈیکل ایڈ ڈراپنگ’ کے اعلان کے بعد کیا گیا ہے۔ بلینکن نے دو روز قبل اردن کا اہم سفارتی دورہ کیا اور یہاں عمان میں اردن کے علاوہ مصر ، متحدہ عرب امارات اور سعودی عرب کے وزرائے خارجہ کے ساتھ بھی ملاقاتیں کیں۔ اس دورہ اردن کے بعد بلینکن نے مغربی کنارے کا دورہ کیا اور فلسطینی اتھارٹی کے صدر محمود عباس سے بھی ملے۔
ہندوستھان سماچار
