ٹیچر کی ہونڈا امیز کار لوٹنے والا بدمعاش دیپانشو پولیس انکاونٹر میں زخمی
غازی آباد، 06 نومبر ۔ غازی آباد دیہات پولیس کمشنریٹ اور لونی پولیس کی سواٹ ٹیم نے پیر کو صبح ایک ٹیچر سے ہونڈا امیز کار لوٹنے والے بدمعاش دیپانشو کو ایک انکاؤنٹر کے دوران گرفتار کرلیا۔ انکاونٹر کے دوران دونوں طرف سے گولیاں چلائی گئیں جس میں بد معاش کے پیر میں گولی لگی اور وہ زخمی ہوگیا۔ اسے اسپتال میں داخل کروایا گیا ہے۔
ڈپٹی کمشنر آف پولیس دیہات وویک چندرا نے بتایا کہ اس بدمعاش نے حال ہی میں اپنے ساتھیوں کے ساتھ مل کر ایک ٹیچر کی کار کو لوٹ لی تھی۔ آج انکاؤنٹر کے دوران بدمعاش سے ایک موٹر سائیکل اور پستول برآمد کی گئی ہے۔
انہوں نے بتایا کہ سواٹ ٹیم اور لونی پولیس کو مخبر سے اطلاع ملی تھی کہ دیپانشو اس جگہ سے گزرنے والا ہے۔ دونوں ٹیموں نے مشترکہ طور پر بنتھلہ سے چروڈی تک نہر کی پٹڑی کے قریب آنے اور جانے والی مشکوک گاڑیوں کی چھان بین شروع کی۔ اسی دوران ایک نوجوان کو موٹر سائیکل پر مشکوک حالت میں آتے دیکھا گیا۔ پولیس نے اسے رکنے کا اشارہ کیا لیکن اس نے موٹر سائیکل کی رفتار بڑھا دی اور بھاگنے لگا۔ پولیس نے پیچھا کیا اور اسے گھیر لیا۔ جب اسے گھیر لیا گیا تو اس نے پولیس پر فائرنگ شروع کر دی۔ پولیس نے بھی جوابی کارروائی کی جس میں وہ زخمی ہو گیا اور پولیس نے اسے پکڑ لیا۔
اس سے پوچھ گچھ میں پتہ چلا کہ اس نوجوان کا نام دیپانشو ہے اور اس نے حال ہی میں اپنے ساتھیوں کے ساتھ جاوالی کی رہنے والی ایک ٹیچر سے کار چھین لی تھی۔ اس کے خلاف کئی مجرمانہ مقدمات درج ہیں۔
