جے ڈی یو ایم پی رات کو پہنچےاسپتال، مریضوں نے کھول دی تیجسوی کے محکمہ کی پول
نالندہ، 31 اکتوبر (ہ س)۔ جے ڈی یو کے رکن پارلیمنٹ کوشلندر کمار پیر کے روز ( 30 اکتوبر) کی رات بہار شریف صدر اسپتال پہنچے اور اچانک معائنہ کرکے مریضوں کی خیریت دریافت کی۔ ایم پی نے ایمرجنسی وارڈ کا بھی معائنہ کیا۔ اس دوران کچھ مریضوں اور ان کے تیمارداروں نے ایم پی سے شکایت کرتے ہوئے نائب وزیراعلیٰ و وزیر صحت تیجسوی یادو کے محکمہ کی پول کھول دی۔
ایم پی کو بتایا کہ ڈاکٹر کسی وارڈ میں داخل مریضوں کی خیریت دریافت کرنے نہیں آتے ہیں۔ پیتھالوجی ٹیکنیشن کے خلاف بھی شکایت کی گئی۔ ایک مریض کے لواحقین نے ایم پی کو بتایا، ’’سروس میں کمی تو ہے سر، عوام کو کوئی سروس فراہم نہیں کی جارہی ہے۔‘‘
ایم پی کی آمد کی اطلاع ملتے ہی دوڑے دوڑے ڈی ایس اور اکاؤنٹنٹ اسپتال پہنچے۔ مریضوں کا معائنہ اور جائزہ لینے کے بعد ایم پی نے ڈی ایس کو نظام کو بہتر بنانے کی ہدایت دی۔ ڈیلیوری وارڈ میں گندگی دیکھ کر ایم پی عہدیداروں پر برہم ہوگئے۔ انہوں نے صحت کے نظام کو بہتر کرنے کوکہا۔
ایم پی نے صدر اسپتال میں واحد بند لفٹ جلد شروع کرنے کی بات کہی۔ ایم پی کوشلندر کمار نے کہا کہ مریضوں کی طرف سے شکایات تھیں، اس لیے انہوں نے صدر اسپتال کا معائنہ کیا۔ یہ بھی کہا گیا کہ حکومت کی طرف سے کئے گئے انتظامات کافی ہیں حالانکہ کچھ کچھ کمی ہے۔ جس جگہ پوسٹ مارٹم ہوتا ہے، وہاں پردو تین دن سے لائٹ خراب ہے۔ اسٹریچر وغیرہ صاف ہیں۔ صفائی کی کچھ کمی ہے جس کو دور کرنے کی ضرورت ہے۔
ایم پی کوشلندر کمار نے مزید کہا کہ کچھ ٹیسٹ ایسے ہوتے ہیں جو رات کو نہیں ہوتے ہیں۔ ایم پی نے یہ بھی کہا کہ میں تو سول سرجن سے یہ کہنا چاہوں گا کہ اگر تھو ڑی سی توجہ دی جائے تو یہ بہار کا نمبر ایک اسپتال بن جائے گا۔ اسپتال میں بند لفٹ کے بارے میں جے ڈی یو کے رکن پارلیمنٹ کوشلندر کمار نے کہا کہ اسے جلد ہی فعال کردیا جائے گا۔
ہندوستھان سماچار/ افضل
/شہزاد
