بکسر میں چوروں کی دہشت، تالا توڑ کر سرکاری اسکولوں میں کررہے ہیں لاکھوں کی چوری
بکسر، 28 اکتوبر(ہ س)۔ بہار کے بکسر ضلع میں چوری کی بڑھتی ہوئی واردات نے لوگوں کے آنکھوں سے نیند غائب کر دی ہے۔ پولیس ایک معاملے کا انکشاف بھی نہیں کرپاتی ہے تب تک چور دوسری واردات کو انجام دے دیتے ہیں۔ چور اب دیہی علاقوں کے سرکاری اسکولوں کو اپنا نشانہ بنا رہے ہیں۔ کچھ ہی روز قبل چنی گاؤں واقع سرکاری اسکول کو چوروں نے نشانہ بنایا تھا۔ اب مفصل تھانہ علاقہ کے مہدہ گاؤں واقع ہائی اسکول میں چوروں نے زبردست چوری کی واردات کو انجام دیا ہے۔
معلومات کے مطابق ضلع کے مفصل تھانہ علاقہ کے مہدہ ہائی اسکول کے دفتر کے کمرے کا تالا توڑ کر چوری کی واردات انجام دی گئی ہے۔ چوراسکول کے کمپیوٹرروم میں رکھا لاکھوں روپے مالیت کا کمپیوٹراورنقدی لے گئے۔ آج جیسے ہی اسکول انتظامیہ کواس کا علم ہوا، پولیس کو اطلاع دی گئی۔ اس کے بعد پولیس اسکول پہنچی اورمعاملے کی تحقیقات کررہی ہے۔
اسکول انتظامیہ نے بتایا کہ اسکول میں نویں اور دسویں جماعت کے امتحانات جاری ہیں۔ امتحان ختم ہونے کے بعد تمام اساتذہ گیٹ بند کرکے گھروں کو چلے گئے۔ اسکول کی سیکورٹی کے لیے تعینات نائٹ چوکیدار علالت کے باعث اسکول نہیں پہنچا جس کا فائدہ اٹھاتے ہوئے چور لاکھوں روپے کا مال لے کر فرار ہو گئے۔ پولیس اس معاملے کی تفتیش کر رہی ہے۔
ہندوستھان سماچار/ افضل
/شہزاد
