ساگر، 18 اکتوبر (ہ س)۔
شہر کے بھگوان گنج چوراہے کے قریب واقع پٹرول پمپ سے متصل ایک عمارت کی چوتھی منزل پر بدھ کی دوپہر اچانک آگ لگ گئی۔ کچھ ہی دیر میں آگ تیزی سے پھیلی اور عمارت کی چوتھی منزل کو اپنی زد میں لے لیا۔ اطلاع ملتے ہی فائر بریگیڈ کی 10 گاڑیاں موقع پر پہنچ گئیں اور کافی مشقت کے بعد آگ پر قابو پالیا گیا تاہم تب تک عمارت کی چوتھی منزل پر رکھا تمام سامان جل کر راکھ ہوگیا۔
معلومات کے مطابق ساگر کے بھگوان گنج چوراہے پر اگروال پٹرول پمپ سے متصل عمارت میں راجو آٹو موبائل کی دکان ہے۔ بدھ کی دوپہر تقریباً 2.30 بجے لوگوں نے اس عمارت کی چوتھی منزل پر دھواں اٹھتے دیکھا اور پولیس کو اطلاع دی۔ اطلاع ملتے ہی کینٹ پولیس کے ساتھ ہی ایڈیشنل کلکٹر، ایس پی، ایس ڈی ایم موقع پر پہنچ گئے اور پٹرول پمپ کو بند کروا دیا۔ تب تک فائر بریگیڈ کی گاڑیاں بھی موقع پر پہنچ گئیں۔ کٹرا اور موتی نگر سے تقریباً 10 فائر ٹینڈر موقع پر پہنچے لیکن تب تک آگ کے شعلے بلند ہونے لگے۔ موقع پر کافی ہجوم جمع تھا۔ پولیس نے پہلے بھیڑ کو ہٹایا اور پٹرول پمپ کو بند کرا دیا۔
حادثے کے بعد موتی نگر، شنی مندر، اپسرا ٹاکیز روڈ سے آنے اور جانے والی گاڑیوں کو روک دیا گیا۔ آس پاس کی تمام دکانیں بند کرا دی گئیں۔ اس کے بعد فائر بریگیڈ کے عملے نے گاڑیاں کھڑی کرنے کا انتظام کیا اور چوتھی منزل پر واٹر کینن استعمال کرنے کی کوشش کی تاہم اونچائی کی وجہ سے پانی عمارت کے اندر نہیں پہنچ سکا۔ اس کے بعد فائر انجن کو کافی فاصلے پر کھڑا کرکے پانی کا چھڑکاؤ کیا گیا اور کافی کوشش کے بعد آگ پر قابو پایا گیا۔
بتایا جا رہا ہے کہ دکان کے اوپری حصے میں آٹو موبائل کا سامان رکھا ہوا تھا۔ اسی دوران آگ لگنے سے گاڑیوں کی بیٹریاں بھی وقفے وقفے سے پھٹ رہی تھیں۔ عمارت کی چوتھی منزل پر ایک ہزار مربع فٹ سے زائد رقبے پر پھیلی آگ کو بجھانے کے لیے فائر فائٹرز کو سخت پسینہ بہانا پڑا۔ اس حادثے میں کوئی جانی نقصان نہیں ہوا تاہم یہاں رکھا لاکھوں مالیت کا سامان جل کر راکھ ہو گیا۔
ہندوستھان سماچار//محمد
