– अनेक रेकाॅर्ड करत दिग्गजांच्या यादीत समावेश
मुंबई, 3 फेब्रुवारी : – भारतीय संघाचा उदयोन्मुख सलामीवीर यशस्वी जयस्वाल याने इंग्लंडविरुद्ध दुसऱ्या कसोटी सामन्यात दणदणीत द्विशतक ठोकले आहे. त्याने विशाखापट्टणम येथे दुसऱ्या दिवशी यशस्वीने २९० चेंडूत २०९ धावांची शानदार खेळी करत आपल्या आंतरराष्ट्रीय कारकिर्दीतील पहिली वहिली द्विशतकी कामगिरी केली आहे. यात १९ चौकार आणि ७ षटकारांचा समावेश आहे. या द्विशतकासह त्याने अनेक रेकॉर्ड केले असून तो भारतात द्विशतक करणारा सर्वांत युवा सलामीवीर ठरला आहे.
द्विशतक करणारा चौथा डावखुरा फलंदाज ठरला आहे. यशस्वीच्या आधी सौरव गांगुली, विनोद कांबळी आणि गौतम गंभीर या तिघांनी ही कामगिरी केली आहे. २००७ मध्ये गांगुलीने पाकिस्तानविरुद्ध द्विशतक ठोकले होते. त्यानंतर पहिल्यांदाच एका डावखुऱ्या भारतीय सलामीवीराने कसोटी द्विशतक ठोकले.
कमी डावात आणि कमी वयात द्विशतक
द्विशतकवीरांच्या यादीत कमी वयात द्विशतक करणाऱ्या सुनील गावस्कर आणि विनोद कांबळी यांच्या यादीत स्थान मिळवले आहे. या यादीत विनोद कांबळी हा पहिल्या क्रमांकावर असून त्याने १९९३ मध्ये इंग्लंडविरुद्ध वयाच्या २१ वर्षे ३५ व्या दिवशी द्विशतक केले होते. तर सुनील गावस्करने २१ वर्षे २८३ दिवसांचा असताना द्विशतक ठोकले होते. यशस्वी जैस्वालने आज वयाच्या २२ वर्षे ३७ दिवसांचा असताना द्विशतक ठोकत मोठा पराक्रम केला.
भारतीय संघासाठी कमी डावात द्विशतक करण्याबाबतही यशस्वीने विक्रम केला आहे. यशस्वीने कसोटी कारकीर्दीतील दहाव्या डावात द्विशतक केले आहे. तर करुण नायरने तिसऱ्या, चेतेश्वर पुजाराने नवव्या, सुनील गावस्कर आणि मयंक अगरवाल या दोघांनी आठव्या आणि विनोद कांबळीने चौथ्या डावातच द्विशतक केले होते.
तसेच यशस्वी भारतासाठी द्विशतक करणारा २५ वा फलंदाज ठरला आहे. या यादीमध्ये सचिन तेंडुलकर, वीरेंद्र सेहवाग यांसारख्या माजी दिग्गजांचा समावेश आहे.
