रायपूर, 02 डिसेंबर (हिं.स.) : छत्तीसगडच्या दंतेवाडा येथे झालेल्या आयईडी स्फोटात सीआरपीएफचे 4 जवान जखमी झाले आहेत. जखमी जवानांना उपचारासाठी रुग्णालयात दाखल करण्यात आले आहे. जखमी जवान धोक्याबाहेर असून त्यांच्यावर रुग्णालयात उपचार सुरू आहेत, तर संपूर्ण परिसरात शोधमोहीम राबवली जात आहे.
यासंदर्भात पोलिसांकडून प्राप्त माहितीनुसार छत्तीसगडच्या विजापूर येथील सीआरपीएफच्या 195 व्या बटालियनचे जवान बरसूर पल्ली रस्त्यावरील सातधार पुलाजवळ नक्षली बॅनर, पोस्टर हटवताना आज, शनिवारी सकाळी 9 वाजेच्या सुमारास आयईडी स्फोट झाला. या घटनेत सीआरपीएफचे 4 जवान जखमी झाले. याबाबत सीआरपीएफ अधिकाऱ्यांनी सांगितले की, जवानांना सुदार तुलार गुहेकडे नक्षलवादी कारवाया सुरू असल्याची माहिती मिळाली होती. झडती घेत असताना सैनिकांना संशयास्पद स्थितीत बॉम्ब असलेली काही पाकिटे सापडली. ही पाकिटे निकामी करण्याचा प्रयत्न करत असतानाच आयईडीचा स्फोट झाला. त्यामुळे 4 जवान जखमी झाले. सध्या जखमींना रायपूरला रेफर करण्यात येणार असल्याचे सांगण्यात येत आहे.
हिंदुस्थान समाचार
