ओटावा, 22 सप्टेंबर (हिं.स.)। कॅनडाने खलिस्तानी इंद्रजीत सिंह गोसलला अटक केली आहे. भारत आणि कॅनडामधील राष्ट्रीय सुरक्षा सल्लागार पातळीवरील बैठकीनंतर खलिस्तानी तत्वांवर ही मोठी कारवाई करण्यात आली आहे. इंद्रजीत सिंह गोसल हा सिख्स फॉर जस्टीस (एसएफजे) या संघटनेच्या नामांकित खलिस्तानी दहशतवादी गुरपतवंत सिंह पन्नू याचा पर्सनल सिक्युरिटी ऑफिसर होता. भारताचे राष्ट्रीय सुरक्षा सल्लागार अजित डोभाल यांनी त्यांच्या कठोर संदेशाद्वारे कॅनडाच्या मार्क कार्नी सरकारवर दबाव टाकला होता की त्यांनी खलिस्तानी दहशतवाद्यांवर कठोर कारवाई करावी आणि त्यानंतरच ही कारवाई झाली आहे.
जून 2023 मध्ये हरदीप सिंह निज्जरच्या मृत्यूनंतर, इंद्रजीत सिंह गोसल अमेरिकेतील खलिस्तानी संघटना सिख्स फॉर जस्टीससाठी कॅनडामध्ये मुख्य आयोजक बनला होता.36 वर्षीय इंद्रजीत याला कॅनडा पोलिसांनी मागील वर्षी नोव्हेंबरमध्ये ग्रेटर टोरांटो एरियामधील (जीटीए) एका हिंदू मंदिरात घडलेल्या हिंसक घटनेप्रकरणी अटक केली होती. मात्र, नंतर त्याला काही अटींसह जामिनावर सोडण्यात आले.
इंद्रजीत सिंह गोसल हा कॅनडामध्ये खलिस्तानसाठी जनमतसंग्रह घेण्याचा कोऑर्डिनेटर आहे आणि सध्या त्याच्यावर शस्त्रास्त्रांशी संबंधित गुन्ह्यांमुळे अटक करण्यात आली आहे. तो गुरपतवंत सिंह पन्नूचा सहयोगी आणि सुरक्षा अधिकारी आहे. भारत सरकारने गुरपतवंत सिंह पन्नूला “खलिस्तानी दहशतवादी” म्हणून नामांकित केले आहे.
सप्टेंबर महिन्याच्या सुरुवातीला, कॅनडा सरकारने आपल्या अंतर्गत अहवालामध्ये हे मान्य केले होते की, खलिस्तानी दहशतवादी संघटना त्यांच्या देशात सक्रिय आहेत, आणि भारताविरुद्ध दहशतीसाठी त्यांना कॅनडामधून निधी मिळतो.
या अहवालात, बब्बर खालसा इंटरनॅशनल आणि इंटरनॅशनल SYF या संघटनांचा उल्लेख होता, ज्या कॅनडाच्या आपराधिक कायद्यानुसार दहशतवादी संघटना म्हणून सूचीबद्ध आहेत. अहवालात असेही म्हटले आहे की, हे अतिरेकी गट आता लहान वैयक्तिक गटांमार्फत कार्य करतात, जे कोणत्याही विशिष्ट संघटनेशी बांधील नसले तरी खलिस्तानच्या मुद्द्याला सक्रिय पाठिंबा देतात.
—————
हिंदुस्थान समाचार / Priyanka Bansode
