मुंबई, 26 ऑक्टोबर, (हिं.स.)।
मराठी चित्रसृष्टीतील लोकप्रिय अभिनेत्री प्रार्थना बेहरे हिला पितृशोक झाला आहे.तिने सोशल मीडियावर भावनिक पोस्ट करत आपल्या वडिलांच्या निधनाची बातमी दिली. या पोस्टनंतर चाहत्यांनी आणि सहकलाकारांनी तिच्या दुःखात सहभागी होत श्रद्धांजली व्यक्त केली आहे.
आपल्या पोस्ट मध्ये ती म्हणाली,
“मर के भी किसी को याद आएंगे
किसी के आंसुओं में मुस्कुराएंगे
कहेगा फूल हर कली से बार बार
जीना इसी का नाम है “
माझे बाबा ….
बाबा ……. तुमच्या जाण्यानंतर आयुष्य जणू थांबल्यासारखं वाटतंय
तुमचं हास्य अजूनही आमच्या कानात गुंजतं, तुमचा आत्मविश्वास आमच्या मनाला बळ देतो, आणि तुमचं जीवन पाहून आम्हाला शिकायला मिळालं की आनंद म्हणजे परिस्थिती नव्हे, तर दृष्टिकोन असतो.
तुमचा प्रामाणिकपणा, सेवाभाव आणि लोकांप्रती असलेलं निस्सीम प्रेम आम्हाला माणुसकीचं खरं मूल्य शिकवून गेलं.
तुम्ही आम्हाला शिकवलंत की इतरांना मदत करणे हेच खरं समाधान आहे.
तुमची अचानक झालेली एक्सिट, मनाला भयंकर लागली आहे. काल परवा पर्यंत सगळ अलबेल होतं. तुमच्या अकाली जाण्याने आम्ही सगळेच खुप दुखावलो आहोत. प्रत्येक क्षणी तुमची आठवण येतच रहाणार आहे.
पण या सगळ्या घटनेला वेगळ्या दृष्टीने पाहीलं तर, तुम्ही अधिक प्रत्येकाच्या जवळ रहाणार आहात. कारण तुम्ही स्मरणात रहाणार. प्रत्येक वेळी प्रत्येक क्षणी, आम्ही आमच्या मनाला वाटेल तेव्हा, तुमच्याशी संवाद साधू शकतोय.
तुम्हाला आजपर्यंत अभिमान वाटेल अशीच कामगिरी मी करत आली आहे. आता अधिक जोमाने कामाला सुरुवात करणार आहे. तुम्ही जिथे कुठे असाल, तुम्हाला माझ्या अप्रतिम कामाने श्रध्दांजली अर्पण करत रहाणं, हे माझं कर्तव्य आहे.
डोळ्यातलं पाणी कधीच तुम्हाला दिसू नये याची काळजी घेईन. कारण मलाही तुम्हाला धूसर पहायचं नाही. तुमचं ओठावरचं हसू, मनात घर करून राहीलं आहे. तेच टिकवण्याची जबाबदारी मी घेणार आहे.
काळजी करू नका… मी खुप स्ट्राँग आहे. कारण माझ्या पाठीशी नाही तर, तुम्ही सोबत आहात याची खात्री आहे.
I LOVE YOU BABA , MISS YOU FOREVER
तुमची Tumpa
नेहमी हसतमुख राहणारी प्रार्थना सध्या अत्यंत कठीण काळातून जात आहे. तिच्या वडिलांच्या आत्म्यास शांती लाभो हीच प्रार्थना.
—————
हिंदुस्थान समाचार / हर्षदा गावकर
