मुंबई, 18 ऑक्टोबर (हिं.स.)। स्कोडा ऑटो इंडियाने आपली बहुप्रतिक्षित लिमिटेड-एडिशन परफॉर्मन्स सेडान ऑक्टाव्हिया आरएस अखेर भारतात लाँच केली आहे. 49.99 लाख रुपये (एक्स-शोरूम) किंमतीची ही कार चेक रिपब्लिकमधून थेट आयात करण्यात आली असून ती 6 नोव्हेंबरपासून देशभरात डिलिव्हरीसाठी उपलब्ध होणार आहे. किंमत जाहीर होण्यापूर्वीच या कारला भारतीय ग्राहकांकडून जबरदस्त प्रतिसाद मिळाला होता. स्कोडाने केवळ 2.5 लाख रुपयांच्या टोकन रकमेसह बुकिंग सुरू केले होते, आणि विशेष म्हणजे भारतासाठी राखीव असलेल्या केवळ 100 युनिट्स अवघ्या 20 मिनिटांत विकल्या गेल्या. म्हणजेच प्रत्येक 12 सेकंदाला एक कार बुक होत गेली आणि स्कोडाच्या या परफॉर्मन्स कारने पुन्हा एकदा चाहत्यांची मनं जिंकली.
स्कोडा ऑक्टाव्हिया आरएस ही कार भारतातील परफॉर्मन्स कार प्रेमींसाठी नेहमीच आकर्षणाचे केंद्र राहिली आहे. 2004 मध्ये भारतात सादर झालेली पहिली टर्बो-पेट्रोल पॅसेंजर कार म्हणून तिचा गौरवशाली इतिहास आहे. यंदा ती अधिक शक्तिशाली, आकर्षक आणि आधुनिक स्वरूपात परतली आहे. बाह्यरचनेत फुल एलईडी मॅट्रिक्स हेडलॅम्प्स, नव्याने डिझाइन केलेले स्पोर्ट्स बम्पर, ग्लॉस ब्लॅक ॲक्सेंट्स आणि ग्रिलवर खास ‘आरएस’ बॅजिंग यामुळे तिचा आक्रमक लूक अधिक ठळक झाला आहे. 19-इंची आकर्षक ॲलॉय व्हील्स, मागील बाजूस एलईडी टेल लॅम्प्स, सिक्वेन्शियल इंडिकेटर्स, ब्लॅक स्पॉयलर आणि ड्युअल ब्लॅक-आउट एक्झॉस्ट पाइप्स यामुळे या सेडानला परफॉर्मन्स कारचा क्लासिक लूक प्राप्त झाला आहे.
कारच्या आतील डिझाइनमध्ये लक्झरी आणि स्पोर्टीनेस यांचा उत्कृष्ट संगम पाहायला मिळतो. बोल्स्टर स्पोर्ट सीट्स, 13-इंचाचा टचस्क्रीन इन्फोटेनमेंट सिस्टम, उच्च प्रतीचे प्रीमियम ट्रिम फिनिशेस आणि डिजिटल ड्रायव्हर डिस्प्ले या सर्व गोष्टी कारच्या मोटरस्पोर्ट-प्रेरित डीएनएला अधोरेखित करतात. तसेच, ब्लू, ब्लॅक, व्हाइट, रेड आणि मांबा ग्रीन या पाच वेगवेगळ्या रंगांच्या पर्यायांमुळे ग्राहकांना वैयक्तिक पसंतीनुसार कार निवडण्याची संधी मिळते.
इंजिनच्या बाबतीतही स्कोडा ऑक्टाव्हिया आरएस तितकीच दमदार ठरते. 2.0-लिटर टीएसआय पेट्रोल इंजिन 265 एचपी पॉवर आणि 370 एनएम टॉर्क निर्माण करतं, तर सात-स्पीड डीएसजी ऑटोमॅटिक गिअरबॉक्स याला जोडलेला आहे. या संयोजनामुळे ही कार अवघ्या 6.6 सेकंदांत 0 ते 100 किमी/तास वेग गाठते आणि तिचा टॉप स्पीड तब्बल 250 किमी/तास इतका आहे. राइड हाइट 15 मिमीने कमी करण्यात आली असून परफॉर्मन्स एक्झॉस्ट सिस्टममुळे तिचा स्पोर्टी कॅरेक्टर आणखी प्रभावी झाला आहे. ही सेडान चालवताना मिळणारा ड्रायव्हिंगचा थरारक अनुभव तिच्या वर्गातील इतर कारपेक्षा निश्चितच वेगळा ठरतो.
लिमिटेड एडिशन असल्यामुळे भारतात फक्त 100 युनिट्स उपलब्ध करून देण्यात आल्या होत्या, आणि काही क्षणांतच त्यांची विक्री पूर्ण झाल्याने या कारची लोकप्रियता अधोरेखित झाली आहे. स्कोडा ऑटो इंडियाने या मॉडेलद्वारे भारतीय परफॉर्मन्स कार सेगमेंटमध्ये आपले स्थान अधिक भक्कम केले आहे. ही कार केवळ शक्ती आणि वेगाचं प्रतीक नसून स्कोडाच्या उत्कृष्ट अभियांत्रिकी, गुणवत्तापूर्ण डिझाइन आणि नवकल्पनांच्या परंपरेचं जिवंत उदाहरण आहे. स्कोडा ऑक्टाव्हिया आरएसचं हे पुनरागमन भारतीय बाजारपेठेत परफॉर्मन्स सेडानच्या नव्या युगाची सुरुवात ठरेल.
—————
हिंदुस्थान समाचार / Suraj Chaugule
