टोकीयो , 11 जुलै (हिं.स.)।जपानमध्ये अचानक झालेल्या पावसाने राजधानी टोक्योतील जनजीवन कोलमडले आहे.टोक्याला लागून असलेल्या काही प्रांतामध्ये अतिवृष्टी झाली आहे. जपानमध्ये पावसामुळे आपत्कालीन स्थिती घोषित करण्यात आली आहे. प्रशासनाने नागरिकांना अलर्ट राहण्याचा इशारा दिला आहे.
टोक्यो आणि शेजारी महत्त्वाच्या शहरातील काही भागात तासाभरातच ११० मिमी पाऊस पडला. पावसाबरोबर वादळी वारे असल्याने नागरिकांचे प्रचंड हाल झाले. टोक्यो, सुगनामी, नेरिमा, शिंजूकू या शहरांतही पूरसदृश्य स्थिती निर्माण झाली.जोरदार वाऱ्यामुळे अनेक ठिकाणी झाडं उन्मळून पडली. तर काही भागात भूस्खलन झाल्याची माहिती समोर येत आहे.प्रशासनाने टोक्यो आणि काही शहरांमध्ये एमर्जन्सी अलर्ट जारी करण्यात आला आहे. नागरिकांनी या काळात घराबाहेर पडू नये असे आवाहन प्रशासनाने केले आहे.
दरम्यान, जपानच्या हवामान विभागाने पुढील काही दिवसात अतिमुसळधार पावसाचा इशारा दिला आहे. काही भागात ढगफुटी, नद्यांच्या पाणीपातळीत वाढ, पूर, भूस्खलन, गारपीट होण्याची शक्यता असून, खबरदारी घेण्याचे आवाहन हवामान विभागाने प्रशासनाला केले आहे.
—————
हिंदुस्थान समाचार / Priyanka Bansode
