कोलकाता. पश्चिम बंगालमधील संदेशखळी येथे महिलांचा लैंगिक छळ आणि जमीन बळकावल्याचा आरोप असलेला तृणमूल काँग्रेसचा नेता शाहजहान शेख याला न्यायालयाने 10 दिवसांची पोलीस कोठडी सुनावली आहे. पोलिसांनी १४ दिवसांची कोठडी मागितली होती, मात्र न्यायालयाने १० दिवसांची परवानगी दिली आहे. सुमारे ५७ दिवसांपासून फरार असलेल्या शाहजहान शेखला आज सकाळीच अटक करण्यात आली आहे.
अंमलबजावणी संचालनालयाच्या अधिकाऱ्यांवर जमावाने केलेल्या हल्ल्यानंतर शाहजहान शेख फरार झाला असून पोलिस अनेक दिवसांपासून त्याचा शोध घेत होते. पोलिसांनी सांगितले की, शेखला उत्तर 24 परगणा जिल्ह्यातील मीनाखा येथील घरातून अटक करण्यात आली. अटकेनंतर त्याला बशीरहाट न्यायालयात नेण्यात आले. शेख याच्या अटकेच्या मागणीसाठी संदेशखळी येथील नागरिक बराच काळ आंदोलन करत होते.
दरम्यान, शेखच्या अटकेवर पश्चिम बंगालचे राज्यपाल सी.व्ही. आनंद बोस म्हणाले, “आज बंगालमध्ये आपण शेवटची सुरुवात पाहत आहोत. संदेशखळी घटनेतील मुख्य आरोपीला झालेली अटक सर्वांचेच डोळे उघडणारी आहे… बंगालमधील हिंसाचार संपवायचा आहे… गेल्या पंचायत निवडणुकीत मला घटनास्थळी जाऊन लोकांशी आणि पीडितेशी बोलण्याची संधी मिळाली. … तिथे गेल्यावर मला कळले की याला लोक ‘गुंडाराज’ म्हणतात, बंगालच्या भागात तो खूप प्रचलित आहे. येत्या काही दिवसांत आम्हाला कठोर कारवाई करावी लागेल…”
