डोंबिवली, ०२ डिसेंबर, (हिं.स) : ठाणे जिल्ह्यातील १०७ रोटरीक्लबतर्फे डिसेंबर तीन ते नऊ डिसेंबर कालावधीत रोटरी सेवा सप्ताह आयोजित करण्यात आला आहे. या काळात सदर सर्व क्लबनी आपापल्या परिसरात विविध सामाजिक उपक्रम हाती घेतले आहेत. एकाच वेळी सर्व क्लब उपक्रम राबविणार असल्याची माहिती रोटरी डिस्ट्रिक्ट ३१४२चे प्रांतपाल मिलींद कुळकर्णी यांनी दिली.
नुकतीच या विषयावर डोंबिवलीत पत्रकार परिषद आयोजित करण्यात आली होती. यावेळी माजी प्रांतपाल डॉ. उल्हास कोल्हटकर, ज्येष्ठ रोटरियन आणि दै. ठाणे वैभवचे संपादक मिलिंद बल्लाळ, सर्जेराव जाधव, डॉ. निलेश जयवंत, देवराम गगरे आदि मान्यवर तसेच विविध रोटरी क्लब अध्यक्ष व रोटरियन उपस्थित होते.
यावेळी माजी प्रांतपाल डॉ उल्हास कोल्हटकर यांनी रोटरीतर्फे सुरु असलेल्या व्यापक उपक्रमाची माहिती दिली. सुमारे दोन अब्ज डॉलरचे उपक्रम राबविण्यात आल्याचेही त्यांनी सांगितले. तर ज्येष्ठ रोटरियन मिलींद बल्लाळ यांनी रोटरीचे उपक्रम हे समाजातील अपेक्षित वर्गाला डोळ्यासमोर ठेवून आखले जातात. ग्रामीण भागात दीर्घकालीन प्रकल्प राबविल्याने तेथील लोकांच्या जीवनातील फरक पडल्याचेही त्यांनी सांगितले.
दरम्यान, विद्यमान प्रांतपाल मिलींद कुळकर्णी म्हणाले, तीन डिसेंबर हा पर्यावरण दिन असल्याने वसुंधरा दिवस म्हणूनही साजरा केला जाईल,यामध्ये ग्लोबल वाॅमिंग जनजागृती, जलसंवर्धन, अपारंपारिक ऊर्जा व तिचा वापर, घनकचरा व्यवस्थापन याविषयावर चर्चा सत्र आणि प्रत्यक्ष उपक्रम राबविण्यात येतील. साप्ताहिक उपक्रमात रक्त दान शिबिर, स्त्रीशक्तीवर आधारित विविध उपक्रम राबविण्यात येईल तसेच महिलांचे अधिकाराविषयक कायदे, आरोग्य, सबलीकरण, स्वसंरक्षण इत्यादी विषयांवर मार्गदर्शन, ज्येष्ठ महोत्सव, ज्येष्ठांच्या कायदेविषयक मार्गदर्शन अशा अनेक प्रश्नावर उपक्रम सर्व रोटरीच्या क्लब मार्फत राबविण्यात येणार आहेत. हे सर्व उपक्रम एकाचवेळी ठरलेल्या दिवशी करण्यात येणार आहेत. तसेच तरुण, तरूणीसाठी युवा महोत्सवही असेल असे त्यांनी नमूद केले.
हिंदुस्थान समाचार
