मुंबई, १ डिसेंबर (हिं.स.) : मुख्यमंत्री एकनाथ शिंदे यांच्याबाबत अपशब्द वापरल्या प्रकरणी दत्ता दळवी यांना अटक करण्यात आली होती. दरम्यान मुलूंड न्यायालयाने त्यांना काही अटी आणि शर्तींच्या अधीन राहून जामीन मंजूर करण्यात आला आहे. १५ हजार रुपयांच्या जातमुचलक्यावर सुटका करण्यात आली आहे.
आरोपी वरिष्ठ नागरिक असून त्यांना काही आजार देखील आहेत, तसेच ते पळून जाण्याची भीती नाही म्हणून जामीन मंजूर करण्यात आल्याचं न्यायालयाकडून स्पष्ट करण्यात आलं आहे. तसेच प्रकरणाचा तपास संपण्यापर्यंत काही प्रतिबंध लागू,
मुख्यमंत्र्यांविरोधात कोणतंही अवमानकारक वक्तव्य करण्यास मनाई, कोणत्याही प्रकारचं प्रक्षोभक वक्तव्य करण्यास मनाई, पोलिसांना सहकार्य करणं बंधनकारक, कायदा आणि सुव्यवस्था प्रश्न निर्माण होऊ नये, याची काळजी घेणं बंधनकारक, या अटी शर्तींवर त्यांची सुटका करण्यात आली आहे.
मुख्यमंत्री एकनाथ शिंदे यांच्याविरोधातील अवमानकारक जाहीर वक्तव्य केले होते. त्या विरोधात भांडुप पोलीस ठाण्यात तक्रार देण्यात आली. त्यानुसार पोलिसांनी भादंवि 153 (A), 153 (B), 153(A) (1) सी, 294, 504, 505 (1) (C) कलमान्वये गुन्हा दाखल करून त्यांना अटकही करण्यात आली होती. त्यांना याआधी न्यायालयात हजर केले असता १४ दिवसांची न्यायालयीन कोठडी सुनावण्यात आली होती. मात्र त्यांना जामीन मंजूर करण्यात आला आहे.
गेल्या दोन दिवसांपासून दत्ता दळवी कारागृहात होते. जामीन मंजूर झाल्यानंतर दत्ता दळवींची ठाणे कारागृहातून सुटका होणार आहे. कोणताही समाज आणि समूहाविरोधात त्यांनी अवमानकारक वक्तव्य केलेले नाही. मात्र, महाराष्ट्राचे मुख्यमंत्री एकनाथ शिंदे यांच्याबाबत हेट स्पीच केल्याचीही नोंद न्यायालयाने घेतली आहे. 41A ची नोटिस न देता दळवी यांना अटक केल्याचा त्यांच्या वकिलांची केलेल्या दाव्याची नोंदही न्यायालयाने घेतली. पोलिसांनी सेक्शन 153 गैरलागू केल्याचा दावा दळवी यांच्या वकिलांनी केला. या स्टेजवर मान्य होऊ शकत नाही, असे निरीक्षण न्यायालयाने नोंदवलं. त्यानंतर चंदा कोचर केसचा संदर्भ देत आरोपी दत्ता दळवी यांचं वय आणि मेडिकल हिस्ट्रीही न्यायालयाने लक्षात घेतली.
हिंदुस्थान समाचार
