लव्ह जिहाद प्रकरणी नागपूर पोलिसांची कारवाई
नागपूर, 25 नोव्हेंबर (हिं.स.) : जम्मू येथून पळवून आणलेल्या हिंदू अल्पवयीन मुलीसह 2 मुस्लीम तरुणांना नागपूर पोलिसांनी अटक केलीय. जम्मू पोलिस आज, शनिवारी रात्री या तिघांनाही नागपुरातून घेऊन जाणार आहेत.
यासंदर्भात पोलिस निरीक्षक हिवरे यांच्याकडून प्राप्त माहितीनुसार जम्मू-काश्मिरातील मुदस्सीर हुसेन मोहम्मद हुसेन आणि यासीर हुसेन मोहम्मद शाहीन या 2 तरुणांनी जम्मू येथील एका अल्पवयीन मुलाला पळवून आणले होते. या मुलीला घेऊन हैदराबादला जाण्याची या तरुणांची योजना होती. यादरम्यान नागपुरात उतरल्यानंतर हे तिघेही शुक्रवारी रात्री रेल्वे स्थानक परिसरात संशयास्पदरित्या फिरत होते. त्यावेळी याठिकाणी गस्तीवर असलेल्या सीताबर्डी पोलिसांना या तिघांचा संशय आला. या तिघांना ताब्यात घेऊन चौकशी केली असता हे दोन्ही तरुण मावस भाऊ असून मुदस्सीर हुसेन आणि अल्पवयीन हिंदू तरुणीचे प्रेम संबंध आहेत. तर यासीर हुसेन हा हैदराबादमध्ये वेटरची नोकरी करतो. नागपूर येथे त्यांना गाडी बदलून या तिघांना हैद्राबादला जायचे होते. त्यासाठी ते नागपुरला उतरले व गाडीला वेळ होता म्हणून रेल्वेस्थानक परिसरात फिरत होते. दरम्यान रात्र गस्तीवर असलेल्या बर्डी पोलिस ठाण्याच्या डी. बी. पथकाला हे तिघे फिरताना दिसले. त्यांची विचारपूस केली असता उत्तरे देताना गांगरल्याने तिघांनाही पोलिस ठाण्यात आणण्यात आले.
मुलीच्या मोबाईलवरून तिच्या आई वडीलांशी संपर्क करून त्यांना माहिती दिली असता त्यांनी जम्मुतील किस्तवाड ठाण्यात कलम 363 अन्वये अपहरणाचा गुन्हा दाखल असल्याचे सांगितले. लागलीच याची माहिती किस्तवाड पोलिसांना देण्यात आली. त्यांनी ते नागपुरात पोहोचेपर्यत मुलांना ठाण्यातच थांबवून ठेवण्याची विनंती केली. त्यानुसार मुलीला शासकीय मुलींच्या वसतिगृहात तर दोघांनाही बर्डी ठाण्यात नेण्यात आले आहे.
हिंदुस्थान समाचार
