સેન્ટિયાગો, નવી દિલ્હી, 1 ડિસેમ્બર (હિ.સ.) શુક્રવારે એફઆઇએચ હોકી મહિલા જુનિયર વર્લ્ડ કપ 2023 ની તેમની બીજી મેચમાં, ભારતીય જુનિયર મહિલા હોકી ટીમ જર્મની સામેની રોમાંચક મેચમાં 4-3 થી હારી ગઈ હતી.
મેચમાં ભારત માટે અન્નુ (11′), રોપની કુમારી (14′), અને મુમતાઝ ખાને (24′) ગોલ કર્યા હતા. જ્યારે જર્મની માટે, સોફિયા શ્વાબે (17′), લૌરા પ્લુથ (21′, 36′) એ ગોલ કર્યા હતા, અને કેરોલિન સીડેલે (38′) ગોલ કર્યા.
ભારતે શરૂઆતના ક્વાર્ટરમાં સારું પ્રદર્શન કર્યું અને જર્મનીના ડિફેન્સ પર દબાણ બનાવ્યું. સતત દબાણના આ તબક્કામાં, ભારતીય ટીમને સળંગ પેનલ્ટી કોર્નર મળ્યા અને અન્નુ (11′) એ બીજી તકનો લાભ લીધો, અને એક શક્તિશાળી શોટ લગાવ્યો અને આખરે તેની ટીમને 1-0 ની લીડ અપાવી.
એક ગોલની લીડ લીધા પછી, ભારતની સ્થિતિ મજબૂત થઈ જ્યારે રોપની કુમારીએ (14′) બીજા પેનલ્ટી કોર્નરને કન્વર્ટ કરીને, પ્રથમ ક્વાર્ટરના અંતે ભારતને 2-0 થી આગળ કર્યું.
જર્મનીએ બીજા ક્વાર્ટરમાં, શાનદાર પુનરાગમન કર્યું અને સોફિયા શ્વાબે (17′)એ એક ઉત્તમ ફિલ્ડ ગોલ કરીને, તેની ટીમ માટે સ્કોરિંગની શરૂઆત કરી. આ ગોલની માત્ર 4 મિનિટ પછી, લૌરા પ્લુથે (21′) એક શાનદાર ગોલ કર્યો અને તેની ટીમને 2-2 ની બરાબરી અપાવી. જો કે, ભારતે આ ગોલનો ઝડપથી જવાબ આપ્યો અને મુમતાઝ ખાને (24′) શાનદાર ગોલ કરીને ભારતને 3-2 થી આગળ કર્યું. હાફ ટાઈમ સુધી ભારતીય ટીમ 3-2 થી આગળ હતી.
હાફ ટાઈમ પછી પોતાની લીડ જાળવી રાખવા માટે દ્રઢસંકલ્પિત ભારતે, ત્રીજા ક્વાર્ટરમાં બોલ પર કબજો રાખવાને પ્રાથમિકતા આપી. તેમ છતાં જર્મની સ્કોર બરાબર કરવામાં સફળ રહ્યું. લૌરા પ્લુથ (36′) એ મેચનો પોતાનો બીજો ગોલ કરીને જર્મનીને 3-3 થી ડ્રો કરાવી હતી. આ પછી, જર્મનીએ આક્રમક વલણ અપનાવ્યું અને તેના હુમલાઓને વધુ તીવ્ર બનાવ્યા. જેનો તેમને પણ ફાયદો થયો અને કેરોલિન સીડેલે (38′) પેનલ્ટી કોર્નરથી ગોલ કરીને, તેની ટીમને 4-3 થી આગળ કરી અને અંતે આ સ્કોર નિર્ણાયક સાબિત થયો.
ભારતીય ટીમ ટુર્નામેન્ટની તેની ત્રીજી મેચ 2 ડિસેમ્બરે બેલ્જિયમ સામે ટકરાશે.
હિન્દુસ્થાન સમાચાર / સુનીલ / માધવી
