પટણા, નવી દિલ્હી, 7 નવેમ્બર (હિ.સ.). કેન્દ્રીય ગૃહમંત્રી અને ભારતીય જનતા પાર્ટી (ભાજપ) ના વરિષ્ઠ નેતા અમિત શાહે, શુક્રવારે પટણામાં દેશના રાષ્ટ્રીય ગીત ‘વંદે માતરમ’ ની 150મી વર્ષગાંઠની ઉજવણી માટે રાષ્ટ્રવ્યાપી અભિયાન શરૂ કરવાની જાહેરાત કરી. આ અભિયાનનો હેતુ દેશભરમાં વિવિધ સ્થાનિક ભાષાઓમાં ગીતનો પ્રચાર કરવાનો છે.
અમિત શાહે જણાવ્યું હતું કે, આ રાષ્ટ્રવ્યાપી અભિયાન દેશભરમાં તબક્કાવાર રીતે હાથ ધરવામાં આવશે, જેમાં ઘણા લોકો ગીતનો વિવિધ સ્થાનિક ભાષાઓમાં અનુવાદ કરીને તેનો સંદેશ ફેલાવશે. આ અભિયાનમાં #વંદે માતરમ150 થીમ આધારિત ડિજિટલ પહેલનો પણ સમાવેશ થશે અને તેનું સોશિયલ મીડિયા પર પ્રસારણ કરવામાં આવશે.
કેન્દ્રીય ગૃહમંત્રી અમિત શાહ, કેન્દ્રીય શિક્ષણ મંત્રી ધર્મેન્દ્ર પ્રધાન અને ભારતીય જનતા પાર્ટી (ભાજપ) ના નેતા વિનોદ તાવડે સાથે, સમારોહ દરમિયાન ‘સ્વદેશી સંકલ્પ પત્ર’ માટે પણ પ્રતિજ્ઞા લીધી હતી. શાહે જાહેરાત કરી કે, વંદે માતરમ અભિયાન દેશભરમાં શરૂ કરવામાં આવશે, જેનો દરેક ભારતીય ભાષામાં પ્રચાર કરવામાં આવશે, જેથી તેની ભાવના દરેક નાગરિક સુધી પહોંચે. તેમણે કહ્યું, ભારત કોઈ જમીનનો ટુકડો નથી; તે એક સંસ્કૃતિ છે, એક વિચાર છે. સંસ્કૃતિ જ આપણને એક તાંતણે બાંધે છે.
જન સંઘ અને ભાજપની રાષ્ટ્રવાદી વિચારધારાને યાદ કરતાં તેમણે કહ્યું કે, પાર્ટીએ હંમેશા રાષ્ટ્રીય હિત અને સ્વદેશીની ભાવનાને પ્રાથમિકતા આપી છે. આના ભાગ રૂપે, કાર્યક્રમમાં હાજર રહેલા બધા લોકોએ સ્વદેશી સંકલ્પ પત્ર વાંચ્યું, જેમાં વિદેશી ઉત્પાદનોને બદલે ભારતીય વસ્તુઓ અપનાવવાનો, દરેક ગામમાં સ્થાનિક ઉત્પાદનને પ્રોત્સાહન આપવાનો અને યુવાનોને સ્વદેશીના મહત્વથી વાકેફ કરવાનો સંકલ્પ લેવામાં આવ્યો હતો. ભારતીય ભાષાઓના ઉપયોગ વધારવા પર પણ ભાર મૂકવામાં આવ્યો હતો.
અમિત શાહ બિહાર વિધાનસભા ચૂંટણી માટે રાષ્ટ્રીય લોકશાહી જોડાણ (એનડીએ) માટે તેમનો પ્રચાર ચાલુ રાખી રહ્યા છે. તેઓ આજે જમુઈ અને ભાગલપુરમાં જાહેર સભાઓ કરવાના છે, અને પૂર્ણિયામાં રોડ શો કરવાના છે. પૂર્ણિયામાં રોડ શો સદર વિધાનસભા મતવિસ્તારના આરએન સાહ ચોક ખાતે વીર સિંહ સ્મારકથી શરૂ થશે અને લખન લાલ ચોક અને ખીરુ ચોક થઈને અસ્થા મંદિર ખાતે સમાપ્ત થશે.
હિન્દુસ્થાન સમાચાર / ગોવિંદ ચૌધરી / ઉદય કુમાર સિંહ
હિન્દુસ્થાન સમાચાર / ડો.હિતેશ એન.વ્યાસ
