ટોક્યો (જાપાન), નવી દિલ્હી, 29 ઓગસ્ટ (હિ.સ.). ભારતના વડા પ્રધાન નરેન્દ્ર મોદી, જાપાનની તેમની બે દિવસીય મુલાકાતના ભાગ રૂપે રાજધાની ટોક્યો પહોંચ્યા છે. ટોક્યોમાં ભારતીય સમુદાયના સભ્યોએ તેમની મુલાકાત કરી છે. વડા પ્રધાન મોદીએ, લગભગ બે કલાક પહેલા તેમના સત્તાવાર એક્સ હેન્ડલ પર આ મુલાકાતનો ફોટો અને વિગતો શેર કરી છે.
પ્રધાનમંત્રી મોદીએ લખ્યું, ટોક્યોમાં ભારતીય સમુદાયના પ્રેમથી હું ખૂબ પ્રભાવિત થયો. જાપાની સમાજમાં મહત્વપૂર્ણ યોગદાન આપીને તેઓ આપણા સાંસ્કૃતિક મૂળને કેવી રીતે સાચવે છે તે ખરેખર પ્રશંસનીય છે. આગામી થોડા કલાકોમાં, હું ભારત અને જાપાન વચ્ચે વેપાર અને રોકાણ સંબંધોને વધુ મજબૂત બનાવવાના ઉદ્દેશ્ય સાથે ઉદ્યોગપતિઓ સાથે વાતચીત કરીશ.
પ્રધાનમંત્રી મોદીએ જાપાનની રાજધાની પહોંચ્યા પછી બીજી એક્સ પોસ્ટમાં લખ્યું, હું ટોક્યો પહોંચી ગયો છું. ભારત અને જાપાન વિકાસ સહયોગને વધુ મજબૂત બનાવવા તરફ આગળ વધી રહ્યા છે અને મને આશા છે કે, આ મુલાકાત પ્રધાનમંત્રી ઇશિબા અને અન્ય લોકો સાથે વિચારોનું આદાન-પ્રદાન કરવાની, આપણી હાલની ભાગીદારીને વધુ મજબૂત બનાવવાની અને સહયોગની નવી શક્યતાઓ શોધવાની તક પૂરી પાડશે.
ભારત સંરક્ષણ ક્ષેત્રમાં જાપાન સાથે કામ કરશે
પ્રધાનમંત્રી મોદીએ તેમની જાપાન મુલાકાત શરૂ કરતા પહેલા, યોમિઉરી શિમ્બુન અખબારને આપેલા લેખિત ઇન્ટરવ્યુમાં કહ્યું હતું કે, ભારત સંરક્ષણ ક્ષેત્રમાં જાપાન સાથે વધુ નજીકથી કામ કરશે. ધ જાપાન ન્યૂઝ અનુસાર, પ્રધાનમંત્રી મોદીએ કહ્યું કે, સુરક્ષા સહયોગ પર જાપાન-ભારત સંયુક્ત ઘોષણાપત્ર, જે તેમની મુલાકાત દરમિયાન સુધારવામાં આવનાર છે, પેઢીઓ માટે સુરક્ષિત અને સ્થિર ઇન્ડો-પેસિફિક ક્ષેત્ર બનાવવાની અમારી મહત્વાકાંક્ષાને આગળ વધારશે.
સંયુક્ત ઘોષણાના સુધારેલા ડ્રાફ્ટ (જે મૂળ 2008 માં હસ્તાક્ષરિત કરવામાં આવ્યો હતો) માં આર્થિક સુરક્ષા અને સંરક્ષણ ઉદ્યોગમાં સહયોગ જેવા નવા ક્ષેત્રોનો સમાવેશ થાય છે. જાપાન અને ભારત શુક્રવારે વડા પ્રધાન શિગેરુ ઇશિબા અને મોદી વચ્ચેની બેઠક દરમિયાન સુધારેલા દસ્તાવેજનું વિનિમય કરવાની યોજના ધરાવે છે. વડા પ્રધાન મોદીએ કહ્યું કે, સંરક્ષણ ક્ષેત્રમાં સહયોગ ભારત અને જાપાન માટે એક મજબૂત સફળતાની વાર્તા રહ્યો છે. તેમણે લખ્યું, જાપાનનો સંરક્ષણ ટેકનોલોજીના ક્ષેત્રમાં પણ સાબિત ટ્રેક રેકોર્ડ છે. રાજકીય વિશ્વાસ અને સહયોગ સાથે, આપણે ફક્ત પોતાના માટે જ નહીં પરંતુ વિશ્વ માટે પણ આગામી પેઢીના સંરક્ષણ પ્લેટફોર્મ ડિઝાઇન અને ઉત્પાદન કરી શકીએ છીએ.
વડા પ્રધાન મોદીએ લખ્યું, ભારતના સ્કેલ અને ક્ષમતાઓને જાપાનની અદ્યતન ટેકનોલોજી સાથે જોડીને, આપણે એક લવચીક અને વિશ્વસનીય સેમિકન્ડક્ટર મૂલ્ય શૃંખલા બનાવી શકીએ છીએ. આ ક્ષેત્રમાં સહયોગ ભારત-જાપાન ભાગીદારીનો મુખ્ય આધારસ્તંભ બનશે.
ભારત હાઇ-સ્પીડ રેલ પ્રોજેક્ટમાં શિંકનસેન સિસ્ટમ અપનાવશે
ઇન્ટરવ્યુમાં, વડા પ્રધાન મોદીએ ભારતમાં હાઇ-સ્પીડ રેલ પ્રોજેક્ટનું પણ વર્ણન કર્યું. આ પ્રોજેક્ટ જાપાનની શિંકાનસેન સિસ્ટમ અપનાવશે. તેમણે કહ્યું કે, રેલ પ્રોજેક્ટ મુંબઈના વાણિજ્યિક કેન્દ્ર અને ઔદ્યોગિક શહેર અમદાવાદને જોડશે. વડા પ્રધાન મોદીએ કહ્યું, અમે એક મોટું લક્ષ્ય નક્કી કર્યું છે. તે છે દેશમાં 7,000 કિમી હાઇ-સ્પીડ રેલ નેટવર્ક પૂરું પાડવાનું. આ પ્રયાસમાં જાપાની કંપનીઓની સક્રિય ભાગીદારીનું હું સ્વાગત કરું છું.
ચીન જતા પહેલા સેમિકન્ડક્ટર ફેક્ટરીનું નિરીક્ષણ કરીશ
યોમિયુરી શિમ્બુનના સમાચાર મુજબ, ભારતીય વડા પ્રધાન મોદી 29 ઓગસ્ટની સવારે જાપાન પહોંચ્યા હતા. આજે બપોરે તેઓ જાપાનના વડા પ્રધાન નિવાસસ્થાને વડા પ્રધાન ઇશિબાને મળશે. બંને નેતાઓ જાપાન અને ભારત વચ્ચે સુરક્ષા સહયોગ અને આર્થિક ભાગીદારીને મજબૂત બનાવવા પર કેન્દ્રિત સંયુક્ત નિવેદન બહાર પાડશે. મે 2023 પછી મોદીની જાપાનની આ પહેલી મુલાકાત છે. બેઠક પછી, બંને નેતાઓ કરારના દસ્તાવેજોનું આદાન-પ્રદાન કરવા અને સંયુક્ત પત્રકાર પરિષદને સંબોધવા માટે એક સમારોહ યોજશે. આ પછી તેઓ રાત્રિભોજન પર તેમની ચર્ચા ચાલુ રાખશે. મોદી 30 ઓગસ્ટના રોજ, તેમના આગામી ગંતવ્ય ચીન જવા રવાના થતા પહેલા સેમિકન્ડક્ટર ઉત્પાદન સાધનોની ફેક્ટરીનું નિરીક્ષણ કરશે.
હિન્દુસ્થાન સમાચાર / મુકુન્દ
હિન્દુસ્થાન સમાચાર / માધવી વ્યાસ
