નવી દિલ્હી : કેન્દ્ર સરકારની તિજોરી, ગુડ્સ એન્ડ સર્વિસ ટેક્સ (જીએસટી)ના રેકોર્ડ કલેક્શનથી ભરાઈ ગઈ છે. ચાલુ નાણાકીય વર્ષ 2024-25ના પ્રથમ મહિનામાં એપ્રિલમાં જીએસટી કલેક્શન વાર્ષિક ધોરણે 12.4 ટકા વધીને, રૂ. 2.10 લાખ કરોડના રેકોર્ડ સ્તરે પહોંચી ગયું છે. ગયા મહિને માર્ચમાં જીએસટીની આવક 1.87 લાખ કરોડ રૂપિયા હતી.
નાણા મંત્રાલયે બુધવારે જારી કરેલા નિવેદનમાં જણાવ્યું હતું કે, સ્થાનિક વ્યવહારો અને આયાતમાં મજબૂત વૃદ્ધિને કારણે, જીએસટી રેવન્યુ કલેક્શનમાં વધારો થયો છે. મંત્રાલયના જણાવ્યા અનુસાર એપ્રિલમાં જીએસટી રેવન્યુ કલેક્શન 12.4 ટકા વધીને રૂ. 2.10 લાખ કરોડ થયું છે. ગયા મહિને માર્ચમાં જીએસટીની આવક 1.87 લાખ કરોડ રૂપિયા હતી. તે જ સમયે, મહિના દર મહિનાના આધારે જીએસટી રેવન્યુ કલેક્શનમાં 18 ટકાનો વધારો થયો છે.
મંત્રાલયના જણાવ્યા અનુસાર, એપ્રિલમાં કુલ 2,10,267 કરોડ રૂપિયાના જીએસટી રેવન્યુ કલેક્શનમાંથી, સેન્ટ્રલ જીએસટી કલેક્શન (સીજીએસટી) રૂપિયા 43,846 કરોડ અને સ્ટેટ જીએસટી (એસજીએસટી) રૂપિયા 53,538 કરોડ હતું. જ્યારે, ઇન્ટિગ્રેટેડ જીએસટી (આઈજીએસટી) રૂ. 99,623 કરોડ (માલની આયાત પર એકત્રિત કરાયેલ રૂ. 37,826 કરોડ સહિત) અને સેસ રૂ. 13,260 કરોડ હતુ. સેસમાં માલની આયાતમાંથી મળેલા રૂ. 1008 કરોડનો સમાવેશ થાય છે.
નાણા મંત્રાલયે એક નિવેદનમાં જણાવ્યું હતું કે, જીએસટી કલેક્શન રૂ. 2 લાખ કરોડના ઐતિહાસિક સીમાચિહ્નને પાર કરી ગયું છે. મંત્રાલયના જણાવ્યા અનુસાર, રિફંડ પછી, એપ્રિલ 2024 માટે ચોખ્ખી જીએસટી આવક 1.92 લાખ કરોડ રૂપિયા રહી છે, જે ગયા વર્ષના સમાન સમયગાળા એટલે કે એપ્રિલ 2023 કરતાં 17.1 ટકા વધુ છે.
