নতুন দিল্লী, ২৯ ছেপ্টেম্বৰ (হি.স.)। এছিয়া কাপৰ ফাইনেলত পাকিস্তানক ৫ উইকেটত পৰাস্ত কৰাৰ পাছতো ভাৰতে এছিয়ান ক্ৰিকেট কাউন্সিলৰ সভাপতি তথা পাকিস্তানৰ গৃহমন্ত্ৰী মহছিন নাকৱীৰ পৰা ট্ৰফী গ্ৰহণ কৰিবলৈ অস্বীকাৰ কৰে।
সূৰ্যকুমাৰ যাদৱৰ নেতৃত্বত টিম ইণ্ডিয়াই অভিলেখ নৱমবাৰৰ বাবে এছিয়া কাপত জয়লাভ কৰে। কিন্তু মেচৰ পিছৰ উপস্থাপন অনুষ্ঠানটো বিতৰ্কৰ মাজত ডুব গৈছিল। পাকিস্তানী দলটোৱে চূড়ান্ত বলটো ব’ল কৰাৰ পাছত প্রায় এঘণ্টা পলম কৰে প্রেজেণ্টেচন অনুষ্ঠানত৷ ইফালে ট্ৰফী আৰু পদক প্ৰদানৰ বাবে উপস্থিত থাকে মহছিন নাকভি।
উপস্থাপক ছাইমন ডাউলে নাকভিয়ে পাকিস্তানী খেলুৱৈক ৰানাৰ্ছ আপৰ পদক প্ৰদান কৰিব বুলি ঘোষণা কৰিছিল যদিও তাৰ পৰিৱৰ্তে বাংলাদেশৰ আমিনুল ইছলামে খেলুৱৈসকলক এই পদক প্ৰদান কৰে। নকভিয়ে কেৱল পাকিস্তানৰ অধিনায়ক ছলমান আঘাকহে ৰানাৰ্ছ আপৰ চেক গতাই দিলে।
ইয়াৰ পিছত ডালে বুজাই দিলে যে ভাৰতীয় খেলুৱৈসকলে পদক বা ট্ৰফী দুয়োটাকে গ্ৰহণ কৰিবলৈ অস্বীকাৰ কৰাৰ ফলত অনুষ্ঠানটো হঠাতে শেষ কৰিবলৈ বাধ্য হয়। ইয়াৰ পিছত ভাৰতীয় খেলুৱৈসকলে কেৱল চেম্পিয়নছৰ বেনাৰ লৈ উদযাপন কৰা দেখা গ’ল।
মন কৰিবলগীয়া যে ফাইনেলৰ পূৰ্বেও সংবাদ মাধ্যমৰ বাতৰিয়ে দাবী কৰিছিল যে ভাৰতীয় দলটোৱে পাকিস্তান ব’ৰ্ডৰ মুৰব্বীগৰাকীৰ পৰা ট্ৰফী গ্ৰহণ কৰিবলৈ অস্বীকাৰ কৰিব। প্ৰতিযোগিতাখনৰ সময়ত ভাৰতীয় খেলুৱৈসকলে পাকিস্তানী খেলুৱৈৰ সৈতে খেলৰ পিছৰ হেণ্ডচেক এৰাই চলিছিল। আনকি সূৰ্যকুমাৰ যাদৱেও টছত পাকিস্তানী অধিনায়ক ছলমানক সম্ভাষণ জনোৱা নাছিল। ফাইনেলৰ পাছত তিলক বৰ্মা আৰু ৰিংকু সিঙেও হাত মিলোৱাৰ পৰা বিৰত থাকে।
हिन्दुस्थान समाचार / মনোজ কুমাৰ শইকীয়া
