আহমেদাবাদ, ১৭ নৱেম্বৰ (হি.স.)। অহা ১৯ নৱেম্বৰত অনুষ্ঠিত হ’বলগীয়া আই চি চি পুৰুষ ক্ৰিকেট বিশ্বকাপৰ চূড়ান্ত খেলখন চাবলৈ আহমেদাবাদৰ নৰেন্দ্ৰ মোডী ষ্টেডিয়ামত উপস্থিত হ’ব দেশৰ বিভিন্ন প্ৰান্তৰ ভিভিআইপিকে ধৰি চেলিব্ৰিটিসকল। ভাৰত আৰু অষ্ট্ৰেলিয়াৰ এই খেলখন চাবলৈ প্ৰধানমন্ত্ৰী নৰেন্দ্ৰ মোডী আৰু কেন্দ্ৰীয় গৃহমন্ত্ৰী অমিত শ্বাহ অহাৰ সম্ভাৱনা আছে। এনে পৰিস্থিতিত আহমেদাবাদ আৰু ইয়াৰ আশে-পাশে থকা বিমানবন্দৰত প্ৰায় ১০০খন চাৰ্টাৰ বিমান অৱতৰণ কৰিব।
আহমেদাবাদ বিমানবন্দৰত ৩০ৰ পৰা ৪০খন চাৰ্টাৰ বিমান পাৰ্ক কৰাৰ ব্যৱস্থা আছে। এই চাৰ্টাৰ বিমানসমূহ আহমেদাবাদৰ আশে-পাশে থকা বিমানবন্দৰতো অৱতৰণ কৰিব পাৰি। ইতিমধ্যে ইয়াৰ বাবে প্ৰস্তুতিত ব্যস্ত হৈ পৰিছে প্ৰশাসন। ১৯ নৱেম্বৰত খেলখন চাবলৈ অহা ভিভিআইপি আৰু চেলিব্ৰিটিসকলৰ চাৰ্টাৰ্ড বিমানৰ বাবে চুৰাট, ৰাজকোট আৰু বদোদৰাত পাৰ্কিঙৰ ব্যৱস্থা কৰা হ’ব।
অৱশ্যে সাধাৰণতে চাৰ্টাৰ বিমানে আহমেদাবাদ বিমানবন্দৰত ভিভিআইপি ড্ৰপ কৰি উভতি আহে। সূত্ৰ অনুসৰি আহমেদাবাদত অনুষ্ঠিত হ’বলগীয়া বিশ্বকাপৰ চূড়ান্ত খেলখন চাবলৈ আহিব দেশৰ বিখ্যাত উদ্যোগপতি মুকেশ আম্বানী, লক্ষ্মী মিত্তল, গৌতম আদানী, জিন্দাল গ্ৰুপ আৰু বলীউডৰ তাৰকা। আহমেদাবাদৰ জি এ টাৰ্মিনেলত ভিভিআইপিৰ বাবে এটা বিশেষ লাউঞ্জৰ সৃষ্টি কৰা হৈছে। ইয়াৰ উপৰিও তেওঁলোকক হোটেল, ষ্টেডিয়ামলৈ নিয়াৰ ব্যৱস্থাও কৰা হৈছে।
হিন্দুস্থান সমাচাৰ/বিনোদ/মনোজ
