মণ্ট্ৰিয়েল, ০৭ আগষ্ট(হি.স.)। ৰাছিয়াৰ ১১ নং স্থানপ্ৰাপ্ত টেনিছ খেলুৱৈ কেৰেন খাচানভে ২০২৫ চনৰ কানাডিয়ান অ’পেনৰ পুৰুষ একক শাখাৰ ফাইনেলত স্থান নিশ্চিত কৰিছে। বুধবাৰে এখন ৰোমাঞ্চকৰ মেচত শীৰ্ষ বাচনিৰ আলেকজেণ্ডাৰ ঝভেৰেভক ৬-৩, ৪-৬, ৭-৬ (৭/৪) ব্যৱধানত পৰাস্ত কৰি স্থান লাভ কৰে। খাচানভে এক সুন্দৰ প্ৰত্যাৱৰ্তন কৰি তৃতীয় ছেটৰ টাইব্ৰেকত ১-৩ ত পিছ পৰি থকাৰ পাছতো জয়লাভ কৰে।
এই জয়ৰ জৰিয়তে খাচানভে কেৰিয়াৰৰ ১১ সংখ্যক এ টি পি ফাইনেলত প্ৰৱেশ কৰিছে, য’ত তেওঁ টেইলৰ ফ্ৰিটজ বা বেন শ্বেলটনৰ বিৰুদ্ধে খেলিব। দুয়োৰে মাজত অনুষ্ঠিত হোৱা অল আমেৰিকান ছেমি ফাইনেলখন কাৰিকৰী দোষৰ বাবে আৰম্ভ হোৱাৰ আগতেই বন্ধ কৰি দিয়া হৈছিল। ইলেক্ট্ৰনিক লাইন কলিং ব্যৱস্থাৰ সমস্যাৰ বাবে মেচখন পিছুৱাই দিব লগা হৈছিল। মেচৰ সময়ত খাচানভে এটা গুৰুত্বপূৰ্ণ মেচ পইণ্ট ৰক্ষা কৰিছিল যেতিয়া তৃতীয় ছেটত স্ক’ৰ ৬-৬ হৈছিল আৰু ঝভেৰেভৰ বেকহেণ্ড নেটত সোমাইছিল। প্ৰায় তিনি ঘণ্টা ধৰি চলি থকা মেচখনত ঝভেৰেভে ৪৪টা অবাঞ্চিত ভুল কৰাৰ বিপৰীতে খাচানভে ২৯টা বিজয়ী আৰু ৩৪টা অবাধ্য ভুলৰ সৈতে সুষম খেল প্ৰদৰ্শন কৰে।
জয়ৰ পিছত খাচানভে কয়, মানসিক আৰু শাৰীৰিকভাৱে এইখন অতি প্ৰত্যাহ্বানমূলক মেচ আছিল। মই নিজকে কৈছিলো যে যিয়েই নহওক কিয়, মই চেষ্টা কৰিব লাগিব আৰু হাৰ নামানিব। টাই ব্ৰেকত ফাইনেলৰ কথা আহিলে নেতিবাচক চিন্তাৰ কোনো স্থান নাথাকে।
খাচানভে এই ছিজনৰ প্ৰথমখন ফাইনেল খেলিব। ইয়াৰ পূৰ্বে বাৰ্চিলোনা আৰু হালেত ছেমি ফাইনেলত পৰাস্ত হৈছিল। প্ৰথম ছেটত চতুৰ্থখন খেলত বিৰতি লৈ অগ্ৰগতি লাভ কৰি শেষলৈকে অগ্ৰগতি বজাই ৰাখিছিল। দ্বিতীয় ছেটত ঝভেৰেভে শেষৰ আঠটা পইণ্ট লাভ কৰি মেচখনত পুনৰ উভতি আহিছিল যদিও শেষত খাচানভে জয়লাভ কৰে।
এতিয়া সকলোৰে দৃষ্টি থাকিব খাচানভৰ অন্তিমখন মেচত, য’ত তেওঁ খিতাপ জয় কৰাৰ চেষ্টা কৰিব আৰু ছিজনৰ প্ৰথমটো ট্ৰফী তুলি ল’ব।
হিন্দুস্থান সমাচাৰ / মনোজ কুমাৰ শইকীয়া
