কলকাতা, ১৬ নৱেম্বৰ (হি স)। কলকাতাৰ ইডেন গাৰ্ডেনত দেওবাৰে অনুষ্ঠিত হোৱা প্ৰথমখন টেষ্ট মেচত দক্ষিণ আফ্ৰিকাই ভাৰতক ৩০ ৰানত পৰাস্ত কৰে। আলহী দলটোৱে দ্বিতীয় ইনিংছত ১৫৩ ৰান কৰি ভাৰতে ১২৪ ৰানৰ লক্ষ্য নিৰ্ধাৰণ কৰে। প্ৰথম ইনিংছত ভাৰতে ১৮৯ ৰান সংগ্ৰহ কৰাৰ বিপৰীতে দক্ষিণ আফ্ৰিকাই প্ৰথম ইনিংছত ১৫৯ ৰান সংগ্ৰহ কৰে।
দ্বিতীয় ইনিংছত ভাৰতীয় দলৰ বেটিং অত্যন্ত দুৰ্বল আছিল, দেওবাৰে দ্বিতীয় অধিবেশনত দলটোৱে ৯৩ ৰান সংগ্ৰহ কৰি অল আউট হৈছিল। ইয়াৰ লগে লগে দক্ষিণ আফ্ৰিকাই দুখন মেচৰ টেষ্ট শৃংখলাত ১-০ ব্যৱধানত অগ্ৰগতি লাভ কৰিছে। আনহাতে ২২ নৱেম্বৰৰ পৰা গুৱাহাটীত অনুষ্ঠিত হ’ব এই শৃংখলাৰ দ্বিতীয়খন টেষ্ট।
মেচ খনত ১২৪ ৰানৰ লক্ষ্য খেদি খেদি ভাৰতীয় দলৰ আৰম্ভণি দুৰ্বল আছিল। দলটোৱে এক ৰানত দুটা উইকেট হেৰুৱাইছিল। প্ৰথমে যশস্বী জয়ছোৱালক এক ৰাণ নকৰাকৈ আউট কৰা হয়, আৰু তাৰ পিছত কে এল ৰাহুলেও মাত্ৰ এটা ৰান সংগ্ৰহ কৰি পেভিলিয়নলৈ উভতি আহে। দুপৰীয়াৰ আহাৰ গ্ৰহণৰ বিৰতিলৈকে ভাৰতে দ্বিতীয় ইনিংছত ১০ ৰানত দুটা উইকেট হেৰুৱাইছিল। দুপৰীয়াৰ আহাৰ গ্ৰহণৰ পিছত ৱাশ্বিংটন সুন্দৰ আৰু ধ্ৰুৱ জুৰেলে সতৰ্কতাৰে বেটিং কৰি ভাৰতৰ স্ক’ৰ ৩০ৰ ওপৰলৈ লৈ যায়। দুয়োজনে ভাল বেটিং কৰি আছিল যেতিয়া ভাৰতে জুৰেলৰ ৰূপত তৃতীয়টো আঘাতৰ সন্মুখীন হয়। জুৰেলে ৩৪ বলত ১৩ ৰান সংগ্ৰহ কৰি আউট হয়। ঋষভ পন্তেও ২ ৰান সংগ্ৰহ কৰি আগতীয়াকৈ আউট হয়।
ভাৰতৰ পঞ্চম উইকেটটো ৰবীন্দ্ৰ জাদেজাৰ ৰূপত পৰিল। ১৮ ৰানত আউট হয় জাডেজা। আনটো মূৰৰ পৰা সতৰ্কতাৰে বেটিং কৰি অহা ৱাশ্বিংটন সুন্দৰেও দলটোৰ মুঠ স্ক’ৰ ৭২ কৰি পেভিলিয়নলৈ উভতি আহিছিল। ৱাশ্বিংটনে ৯২টা বলৰ সন্মুখীন হৈ ৩১ ৰান সংগ্ৰহ কৰিছিল। ইয়াৰ পিছতে কুলদীপ যাদৱে এক ৰান কৰি আউট হয়। দলটোক তেতিয়াও ৪০ ৰানতকৈ অধিক ৰান সংগ্ৰহ কৰাৰ প্ৰয়োজন আছিল। এনে পৰিস্থিতিত অক্ষৰ পেটেলে দ্ৰুতগতিত ৰান সংগ্ৰহ কৰি চাৰিটা আৰু তাৰ পিছত দুটা ছয় কৰে। ইফালে আৰু এটা ডাঙৰ শ্বট খেলিবলৈ চেষ্টা কৰি থাকোঁতে অক্ষৰ নিজৰ উইকেট হেৰুৱাই পেলায়। অক্ষৰ ১৭টা বলত ২৬ ৰান সংগ্ৰহ কৰি আউট হয়, য’ত এটা চাৰি আৰু দুটা ছয়ো আছিল। অৱশেষত মহম্মদ ছিৰাজ কোনো ৰাণ নকৰাকৈ আউট কৰা হয়। ভাৰতীয় অধিনায়ক শুভমন গিলে প্ৰথম ইনিংছত ৪ ৰান সংগ্ৰহ কৰি আঘাতপ্ৰাপ্ত হৈ অৱসৰ গ্ৰহণ কৰে। ডিঙিত হোৱা আঘাতৰ বাবে তেওঁ সমগ্ৰ মেচখনৰ পৰা বাহিৰ হ’ল, যাৰ ফলত ভাৰতীয় ইনিংছ ৯৩ ৰানত সমাপ্ত হয়।
দক্ষিণ আফ্ৰিকাৰ হৈ চাইমন হাৰ্মাৰে ৪টা উইকেট দখল কৰাৰ বিপৰীতে মাৰ্কো জান্সেন আৰু কেশৱ মহাৰাজে দুটাকৈ উইকেট দখল কৰে। আইডেন মাৰ্ক্ৰামে এটা উইকেট দখল কৰে।
দ্বিতীয় ইনিংছত দক্ষিণ আফ্ৰিকাৰ ১৫৩ ৰান সংগ্ৰহ
ইয়াৰ পূৰ্বে আজি পুৱা দক্ষিণ আফ্ৰিকাৰ দ্বিতীয় ইনিংছত ১৫৩ ৰাণত অল আউট হয়। আলহী দলটোৰ বাকী তিনিটা উইকেট প্ৰথম অধিবেশনতে অন্ত পৰে। কৰবিন বছ ২৫ ৰানত আউট হয়, আৰু চাইমন হাৰ্মাৰে ৭ ৰানত আউট হয়। কেশৱ মহাৰাজ একাউণ্ট নোখোলাকৈ এল বি ডব্লিউ হয় । দ্বিতীয় দিনা দক্ষিণ আফ্ৰিকাই ৭টা উইকেট হেৰুৱাইছে। দক্ষিণ আফ্ৰিকাৰ হৈ অধিনায়ক টেম্বা বাভুমাই সুন্দৰ বেটিং কৰি ৫৫ ৰানত অপৰাজিত হৈ থাকে।
ভাৰতীয় দলৰ হৈ ৰবীন্দ্ৰ জাদেজাই ৪টা উইকেট দখল কৰে। কুলদীপ যাদৱ আৰু মহম্মদ চিৰাজে দুটাকৈ উইকেট দখল কৰাৰ বিপৰীতে যশপ্ৰীত বুমৰাহ আৰু অক্ষৰ পেটেলে এটাকৈ উইকেট দখল কৰে।
প্ৰথম ইনিংছত ভাৰতৰ ১৮৯ ৰান সংগ্ৰহ
ভাৰতে প্ৰথম ইনিংছত ১৮৯ ৰান সংগ্ৰহ কৰি ৩০ ৰানৰ সামান্য অগ্ৰগতি লাভ কৰে। দলটোৰ হৈ অ’পেনাৰ কে এল ৰাহুলে সৰ্বাধিক ৩৯ ৰান সংগ্ৰহ কৰাৰ বিপৰীতে ৱাশ্বিংটন সুন্দৰে ২৯ ৰান সংগ্ৰহ কৰে। ইয়াৰ উপৰিও ঋষভ পন্তে ২৭, ৰবীন্দ্ৰ জাদেজাই ২৭, অক্ষৰ পেটেলে ১৬, ধ্ৰুৱ জুৰেলে ১৪, যশস্বী জয়ছোৱাল ১২, কুলদীপ যাদৱে ১, মহম্মদ ছিৰাজে ১ আৰু যশপ্ৰীত বুমৰাহ ১ ৰাণত নট আউট হৈ ৰয়। ইফালে চাৰি ৰান সংগ্ৰহ কৰি আঘাতপ্ৰাপ্ত হৈ অৱসৰ গ্ৰহণ কৰে অধিনায়ক গিল।
দক্ষিণ আফ্ৰিকাৰ হৈ চাইমন হাৰ্মাৰে ৪টা উইকেট দখল কৰাৰ বিপৰীতে মাৰ্কো জান্সেনে ৩টা উইকেট দখল কৰে। কেশৱ মহাৰাজ আৰু কৰ্বিন বছে এটাকৈ উইকেট দখল কৰে।
দক্ষিণ আফ্ৰিকাৰ প্ৰথম ইনিংছঃ
টছত জয়ী হোৱাৰ পিছত বেটিং কৰিবলৈ বাছি লোৱা দক্ষিণ আফ্ৰিকাৰ আৰম্ভণিও আশা কৰাতকৈ কম আছিল। শীৰ্ষ অৰ্ডাৰ সম্পূৰ্ণৰূপে থৰক বৰক কৰিলে আৰু প্ৰথম ইনিংছত দলটোৱে ১৫৯ ৰানত অল আউট হয়। তেওঁলোকৰ হৈ আইডেন মাৰ্ক্ৰামে সৰ্বাধিক ৩১ ৰান সংগ্ৰহ কৰে। আন কোনো বেটছমেনে ৩০ ৰান অতিক্ৰম কৰিব নোৱাৰিলে আৰু ভাৰতীয় বলাৰসকলে তেওঁলোকক হেঁচাত ৰাখি দ্ৰুত ভাৱে পেভিলিয়নলৈ ঘূৰাই পঠিয়ালে।
ভাৰতৰ হৈ প্ৰথম ইনিংছত যশপ্ৰীত বুমৰাহে ৫টা উইকেট দখল কৰাৰ বিপৰীতে কুলদীপ যাদৱ আৰু মহম্মদ চিৰাজে দুটাকৈ উইকেট দখল কৰাৰ লগতে অক্ষৰ পেটেলে এটা উইকেট দখল কৰে।
हिन्दुस्थान समाचार / অৰৱিন্দ
