– ষ্টেচীয়ে অষ্ট্ৰেলিয়াৰ হৈ ৩২১খন আন্তঃৰাষ্ট্ৰীয় মেচ খেলিছিল আৰু চাৰিখন অলিম্পিক গেমছত অংশগ্ৰহণ কৰিছিল
ভুৱনেশ্বৰ, ১৬ ছেপ্টেম্বৰ (হি.স.)। আগন্তুক হিৰো হকী ইণ্ডিয়া লীগ ছিজনৰ পূৰ্বে বেদান্ত কলিংগা লেন্সাৰ্ছে অষ্ট্ৰেলিয়াৰ হকী মহান জে ষ্টেচীক দলৰ নতুন মুখ্য প্ৰশিক্ষক হিচাপে নিযুক্তি দিছে । যোৱা ছিজনত দলটোক নেতৃত্ব দিয়া জাৰ্মান প্ৰশিক্ষক ভেলেন্টিন আলটেনবাৰ্গৰ ঠাইত তেওঁ অংশগ্ৰহণ কৰিব।
চাৰিখন অলিম্পিক গেমছত অংশগ্ৰহণ কৰা আৰু অষ্ট্ৰেলিয়াৰ হৈ অভিলেখ সৃষ্টিকাৰী ৩২১খন আন্তঃৰাষ্ট্ৰীয় মেচ খেলা ষ্টেচীয়ে খেলুৱৈ আৰু প্ৰশিক্ষক দুয়োটা ভূমিকাতে বিস্তৃত অভিজ্ঞতাৰে পুষ্ট। অষ্ট্ৰেলিয়াৰ হৈ তিনিটা অলিম্পিক পদক লাভ কৰে (১৯৯২ চনত বাৰ্চিলোনাত ৰূপ, ১৯৯৬ চনত আটলান্টা আৰু ২০০০ চনত ছিডনীত ব্ৰঞ্জৰ পদক)। ইয়াৰ উপৰিও তেওঁ ১৯৯৮ চনৰ কমনৱেলথ গেমছ (কুৱালালামপুৰ) আৰু ১৯৯৯ চনৰ চেম্পিয়নছ ট্ৰফীতো সোণৰ পদক লাভ কৰে। ১৯৯৯ চনত তেওঁ এফ আই এইচৰ বছৰৰ শ্ৰেষ্ঠ খেলুৱৈ হিচাপেও নিৰ্বাচিত হয়। ২০০০ চনত অষ্ট্ৰেলিয়াৰ সৰ্বাধিক কেপিং খেলুৱৈ হিচাপে ষ্টেচীয়ে অৱসৰ গ্ৰহণ কৰে।
প্ৰশিক্ষক জীৱনত তেওঁ অষ্ট্ৰেলিয়া, নেদাৰলেণ্ড আৰু বেলজিয়ামত ক্লাব আৰু ঘৰুৱা পৰ্যায়ত কাম কৰি আহিছে। ইয়াৰ উপৰিও ২০১৬ আৰু ২০১৭ চনত হকী ইণ্ডিয়া লীগৰ মুম্বাই ফ্ৰেঞ্চাইজিৰ মুখ্য প্ৰশিক্ষকৰ দায়িত্বও আছিল। ২০২২ চনৰ পৰা তেওঁ অষ্ট্ৰেলিয়াৰ জুনিয়ৰ দলৰ মুখ্য প্ৰশিক্ষকৰ ভূমিকা পালন কৰিছিল।
বেদান্ত এলুমিনিয়ামৰ চিইঅ’ ৰাজীৱ কুমাৰে কয় যে জে ষ্টেচীয়ে নিজৰ কেৰিয়াৰত উল্লেখযোগ্য কৃতিত্ব অৰ্জন কৰিছে আৰু আন্তঃৰাষ্ট্ৰীয় হকীৰ অন্যতম সন্মানীয় নাম। তেওঁৰ নেতৃত্বত আমাৰ দলটোৱে নিশ্চিতভাৱে নতুন উচ্চতাত উপনীত হ’ব আৰু খিতাপ জয় কৰাৰ লগতে খেলুৱৈসকলক উৎকৃষ্ট কেৰিয়াৰ গঢ়িবলৈ উৎসাহিত কৰাৰ আমাৰ লক্ষ্য বাস্তৱায়িত কৰিব।
নিযুক্তিৰ বাবে সুখ প্ৰকাশ কৰি জে ষ্টেচীয়ে কয় যে বেদান্ত কলিংগ লেন্সাৰ্ছৰ সৈতে নতুন অধ্যায় আৰম্ভ কৰিবলৈ পাই মই উচ্ছ্বসিত আৰু হকী ইণ্ডিয়া লীগলৈ ঘূৰি আহিবলৈ পাই ৰোমাঞ্চিত হৈছো। যোৱাবাৰ এই লীগে মোক প্ৰশিক্ষক হিচাপে বহু কথা শিকাইছিল আৰু মই নিশ্চিত যে এই অভিজ্ঞতাও সমানেই বিশেষ হ’ব। ভাৰতলৈ উভতি আহি ইমান ডাঙৰ ফ্ৰেঞ্চাইজিৰ সৈতে কাম কৰাটো মোৰ বাবে গৌৰৱৰ বিষয়। এই সুযোগৰ বাবে বেদান্ত কলিংগৰ প্ৰতি কৃতজ্ঞতা আৰু এক ৰোমাঞ্চকৰ যাত্ৰাৰ বাবে আগ্ৰহী।
বেদান্ত কলিংগা লেন্সাৰ্ছে দলটোক শক্তিশালী কৰি উৎকৃষ্ট নেতৃত্ব প্ৰদান কৰাৰ বাবে প্ৰাক্তন প্ৰশিক্ষক ভেলেন্টিন আলটেনবাৰ্গক ধন্যবাদ জনায়।
हिन्दुस्थान समाचार / মনোজ কুমাৰ শইকীয়া
