মেলবৰ্ণ, ০২ জানুৱাৰী (হি.স.)। অহা ১৮ জানুৱাৰীৰ পৰা মেলবৰ্ণত আৰম্ভ হ’বলগীয়া ২০২৬ চনৰ অষ্ট্ৰেলিয়ান অ’পেন টেনিছ প্ৰতিযোগিতাখনৰ বাবে সাতবাৰৰ গ্ৰেণ্ড শ্লেম একক চেম্পিয়ন ভেনাছ উইলিয়ামছে ৱাইল্ডকাৰ্ড প্ৰৱেশৰ অনুমতি লাভ কৰিছে। শুকুৰবাৰে প্ৰতিযোগিতাখনৰ আয়োজকসকলে এই কথা আনুষ্ঠানিকভাৱে নিশ্চিত কৰিছে।
প্ৰায় ২৮ বছৰৰ পাছত মেলবৰ্ণ পাৰ্কলৈ উভতি আহিব ৪৫ বছৰীয়া ভেনাছ উইলিয়ামছ। ১৯৯৮ চনত প্ৰথমবাৰৰ বাবে ইয়াত খেলিছিল, দ্বিতীয় ৰাউণ্ডত তেওঁৰ সৰু ভগ্নী ছেৰেনা উইলিয়ামছক পৰাস্ত কৰিছিল। অৱশ্যে কোৱাৰ্টাৰ ফাইনেলত সহযোগী আমেৰিকান লিণ্ডচে ডেভেনপ’ৰ্টৰ হাতত পৰাস্ত হয়।
নৱেম্বৰ মাহত ভেনাছে অষ্ট্ৰেলিয়ান অ’পেনৰ দুসপ্তাহ পূৰ্বে নিউজিলেণ্ডৰ অকলেণ্ডত খেলিব বুলি ঘোষণা কৰিছিল, য’ত তেওঁ ৱাইল্ডকাৰ্ডো লাভ কৰিছিল। ইয়াৰ উপৰিও অষ্ট্ৰেলিয়ান অ’পেনৰ ঠিক আগতে অষ্ট্ৰেলিয়াৰ হোবাৰ্টত অনুষ্ঠিত হ’বলগীয়া প্ৰতিযোগিতাত অংশগ্ৰহণ কৰিব।
ভেনাছ উইলিয়ামছে শেষবাৰৰ বাবে ২০২১ চনত মেলবৰ্ণত খেলিছিল।অষ্ট্ৰেলিয়ান অ’পেন মহিলা একক শাখাত দুবাৰকৈ ৰানাৰ্ছ আপ স্থান দখল কৰিছে—২০০৩ আৰু ২০১৭ চনত, দুয়োবাৰেই ফাইনেলত ভগ্নী ছেৰেনাৰ হাতত পৰাস্ত হৈছিল।
ভেনাছে কয়, মই অষ্ট্ৰেলিয়ালৈ উভতি আহিবলৈ পাই অতিশয় উৎসাহিত হৈছো আৰু অষ্ট্ৰেলিয়াৰ গ্ৰীষ্মকালত প্ৰতিযোগিতাত অংশগ্ৰহণ কৰিবলৈ আগ্ৰহী। ইয়াত মোৰ ইমানবোৰ আচৰিত স্মৃতি আছে, আৰু সেই ঠাইলৈ ঘূৰি অহাৰ সুযোগ পোৱাটোৱে মোৰ কেৰিয়াৰৰ বাবে বহুত গুৰুত্বপূৰ্ণ।
মেলবৰ্ণ পাৰ্কত ভেনাছৰ ৫৪টা জয় আৰু ২১টা পৰাজয়ৰ অভিলেখ আছে। ২০২৬ চন হ’ব তেওঁৰ ২২ সংখ্যক অষ্ট্ৰেলিয়ান অ’পেনৰ মূল ড্ৰ’ত।
প্ৰতিযোগিতাখনৰ আয়োজকসকলে জনোৱা মতে, অষ্ট্ৰেলিয়ান অ’পেনৰ মূল ড্ৰ’ত খেলা আটাইতকৈ বয়সীয়াল মহিলা খেলুৱৈ হিচাপে পৰিগণিত হ’ব ভেনাছ উইলিয়ামছ। ইয়াৰ পূৰ্বে এই অভিলেখ জাপানৰ কিমিকো ডেটৰ হাতত আছিল, যিয়ে ২০১৫ চনত ৪৪ বছৰ বয়সত ইয়াত খেলিছিল।
हिन्दुस्थान समाचार / মনোজ কুমাৰ শইকীয়া
