গোলাঘাট, ১৩ আগষ্ট (হি.স.)। বোকাখাতত এ জে ৱাই চি পিৰ প্ৰতিবাদ। অসমত আন্তঃৰাজ্যিক পাৰ পত্ৰ ব্যৱস্থা প্ৰৱৰ্তন কৰা, কা-আইনৰ অধীনত অসম চৰকাৰে ২০১৪ চনৰ ৩১ ডিচেম্বৰৰ পূৰ্বে অহা অ-মুছলমান লোকৰ বিৰুদ্ধে গোচৰ প্ৰত্যাহাৰ কৰি নাগৰিকত্ব প্ৰদান কৰিবলৈ যি নিৰ্দেশনা জাৰি কৰিছিল, সেই নিৰ্দেশনা বাতিলৰ দাবীত অসম জাতীয়তাবাদী যুৱ ছাত্ৰ পৰিষদ বোকাখাত জিলা সমিতিয়ে বোকাখাত নগৰৰ মাজমজিয়াত অৱস্থান ধৰ্মঘট কাৰ্যসূচী ৰূপায়ন কৰে ৷
যুৱ ছাত্ৰ পৰিষদে পাৰ পত্ৰ ব্যৱস্থা প্ৰৱৰ্তনৰ বাবে যোৱা ৫০ টা বছৰে ৰাজ্য আৰু কেন্দ্ৰীয় চৰকাৰক দাবী জনাই আহিছে ৷ বৰ্তমান সময়ত পাৰ পত্ৰ ব্যৱস্থা প্ৰাসংগিক হৈ পৰিছে ৷ অৱস্থান ধৰ্মঘটস্থলীৰ পৰা সংগঠনটোৱে দুয়োখন চৰকাৰকে অসমত পাৰ পত্ৰ ব্যৱস্থা প্ৰৱৰ্তন কৰাৰ দাবী জনাইছে ৷ তাৰোপৰি শেষতীয়াকৈ ৰাজ্য চৰকাৰে কা-আইনৰ গইনা লৈ অসমত বসবাস কৰা ২০১৪ চনৰ ৩১ ডিচেম্বৰৰ পূৰ্বে অহা অ-মুছলমান লোকৰ বিৰুদ্ধে গোচৰ প্ৰত্যাহাৰ কৰি নাগৰিকত্ব প্ৰদান কৰিবলৈ যি নিৰ্দেশনা জাৰি জাৰি কৰিছে, তাৰো বিৰোধিতা কৰিছে সংগঠনটোৱে ৷ এই নিৰ্দেশনা কাৰ্যকৰী হ’লে অসমীয়া জাতিৰ কলা-সংস্কৃতি, পৰম্পৰা আদি লোপ পাব বুলি আশংকা কৰিছে সংগঠনটোৱে ৷ সেয়ে উক্ত নিৰ্দেশনা বাতিল কৰাৰ লগতে আন্তঃৰাজ্যিক পাৰ পত্ৰ ব্যৱস্থা প্ৰৱৰ্তনৰ দাবীত সংগঠনটোৱে অৱস্থান ধৰ্মঘট কাৰ্যসূচী ৰূপায়ন কৰিছে ৷
হিন্দুস্থান সমাচাৰ / প্ৰকাশ ডেকা
