গুৱাহাটী, ২২ জুন (হি.স.)। প্ৰজ্ঞা আৰু বৌদ্ধ চেতনা-ভাৰতৰ উদ্যোগত “ভাৰতীয় সনাতন পৰম্পৰাত বৌদ্ধ দৰ্শন আৰু শিক্ষা” শীৰ্ষক এক বক্তৃতা অনুষ্ঠান গুৱাহাটীৰ উজান বজাৰস্থিত বিবেকানন্দ কেন্দ্ৰত অনুষ্ঠিত হয় ৷ অনুষ্ঠানটোৰ আৰম্ভণিতে মুখ্য বক্তা হিচাপে উপস্থিত থকা অসম গৌৰৱ সৌম্যদ্বীপ দত্ত দেৱে ভাৰত মাতাৰ সন্মুখত বন্তি প্ৰজ্বলন কৰি বক্তৃতা অনুষ্ঠানটো শুভাৰম্ভ কৰে।
প্ৰজ্ঞাৰ কাৰ্যকৰ্তা অৰূপ বুজৰবৰুৱাই আঁত ধৰা অনুষ্ঠানটোত সংগীত শিল্পী শৰৎ ৰাগে এটি ভক্তিমূলক গীতেৰে সভাৰ সৌন্দৰ্য বৰ্দ্ধন কৰে। সৌম্যদ্বীপ দত্তদেৱে অনুষ্ঠানটোৰ আয়োজক সমিতিক ধন্যবাদ জনাই তেখেতৰ বক্তৃতাৰ মূল বিষয় ভাৰতীয় সনাতন পৰম্পৰাত বৌদ্ধ দৰ্শন আৰু শিক্ষা সম্পৰ্কীয় বিভিন্ন বিষয় সভাত উত্থাপন কৰে।
মুখ্য বক্তা অসম গৌৰৱ সৌম্যদ্বীপ দত্তদেৱে তেওঁৰ বক্তৃতা আৰম্ভ কৰিলে বৌদ্ধ দৰ্শনৰ মুখ্য নীতি সমূহৰ কথা উল্লেখ কৰি, য’ত দুখৰ প্ৰকৃতি আৰু মুকলি হোৱা পথ উল্লেখ কৰি চাৰি মহৎ সত্যৰ বিষয় আৰু অষ্টমাৰ্গৰ উল্লেখ আছিল। বক্তৃতাত প্ৰায় ১২০ৰ পৰা ১৫০ বছৰৰ সময়ৰ পৰা প্ৰচলিত ভ্ৰান্ত কাহিনীসমূহৰ আলোচনা কৰা হৈছিল, য’ত বৌদ্ধধর্মক হিন্দুধর্মৰ পৰা সম্পূৰ্ণভাৱে স্বতন্ত্ৰ বুলি বৰ্ণনা কৰা হৈছিল, আৰু ই আধ্যাত্মিক আৰু ঐতিহাসিক জটিলতাসমূহৰ প্ৰতিচ্ছবি প্ৰদান নকৰা বুলি ধাৰণা কৰা হৈছিল।
বৌদ্ধ ধৰ্মৰ ওপৰত প্ৰতিমাৰ পূজাৰ আৰু ভাৰতীয় সংস্কৃতিৰ বিপৰীতে থকা ভ্ৰান্ত কাহিনী আছিল। তেওঁ লগতে উল্লেখ কৰিলে যে ব্ৰিটিছ উপনিবেশী শাসন আৰু তাৰ পিছৰ ৰাষ্ট্ৰীয়তাবাদী আন্দোলনসমূহ ভাৰতত বৌদ্ধ ধৰ্মক হিন্দুধর্মৰ পৰা অনন্য আৰু পৃথক ধৰ্ম হিচাপে গঢ়াৰ ক্ষেত্ৰত ভূমিকা পালন কৰিছিল। কিন্তু এতিয়া ভ্ৰান্ত কাহিনীৰ বিৰুদ্ধে সকলোৱে সজাগ হৈ শক্তিশালী স্থিতি গ্ৰহণ কৰা অত্যাৱশ্যক।
অনুষ্ঠানটোত মূল বক্তা হিচাপে অসম গৌৰব সৌম্যদ্বীপ দত্ত, বিশিষ্ট অতিথি হিচাপে কৰুণা শাস্ত্ৰী মহাথেৰ লগতে সভাত উপস্থিত থাকে বশিষ্ঠ বুজৰবৰুৱা, ৰাষ্ট্ৰীয় স্বয়ংসেৱক সংঘৰ ক্ষেত্ৰ প্ৰচাৰক, প্ৰজ্ঞাৰ সাধাৰণ সম্পাদক হিতেশ্বৰ চক্রৱৰ্তী, বুদ্ধ চেতনা ভাৰতৰ সমন্বয়ক নবনীতা শৰ্মা আৰু বিশিষ্ট কবি, সাহিত্যিক, গবেষক, ছাত্ৰ-ছাত্ৰী, শিল্পী, বিদ্বান অতিথিসকল।
অনুষ্ঠানটোত প্ৰায় ২৫০ জন মানুহ উপস্থিত আছিল। বক্তৃতাটো এটা ইতিবাচক আলোচনাৰ আৰম্ভণি হৈ পৰে আৰু ভাৰতৰ সমৃদ্ধ সাংস্কৃতিক পৰম্পৰা সন্দৰ্ভত মূল্যবান দৃষ্টি প্ৰদান কৰে। অনুষ্ঠানৰ প্ৰশ্নোত্তৰ পৰ্বৰ আগতে বিশিষ্ট অতিথি কৰুণা শাস্ত্ৰী মহাথেৰদেৱক সামাজিৰ সাংস্কৃতিক অনুষ্ঠান প্ৰজ্ঞা আৰু বুদ্ধ চেতনা-ভাৰত দুয়োটি সংগঠনৰ দ্বাৰা সম্বৰ্দনা প্ৰদান কৰা হয়। সভাৰ অন্তত কৃষ্ণা মৃগাঙ্ক বৰ্মনে শলাগৰ শৰাই আগবঢ়াই আৰু বন্দে মাতৰম গীতেৰে অনুষ্ঠানটোৰ সফল সমাপ্ত হয়।
हिन्दुस्थान समाचार / মনোজ কুমাৰ শইকীয়া
