– প্ৰতি ইঞ্চি মাটি বেদখলৰ পৰা মুক্ত কৰাটো আমাৰ প্ৰতিশ্ৰুতি: মুখ্যমন্ত্ৰী
– গৰুখুটি স্বাৱলম্বী অসমৰ প্ৰতীকঃ মুখ্যমন্ত্ৰী
গুৱাহাটী, ২১ জুলাই (হি.স.)। মুখ্যমন্ত্ৰী ড° হিমন্ত বিশ্ব শৰ্মাই সোমবাৰে দৰং জিলাৰ ছিপাঝাৰৰ গৰুখুটি বহুমুখী কৃষি প্ৰকল্পৰ চতুৰ্থ প্ৰতিষ্ঠা দিৱস উদযাপন সমাৰোহত অংশগ্ৰহণ কৰে। এই প্ৰকল্পটোক অসমৰ স্বাৱলম্বীতাৰ প্ৰতীক বুলি অভিহিত কৰি তেওঁ কয় যে ই ৰাজ্যখনৰ নতুন নিৰ্মাণৰ আধাৰ হৈ পৰিছে। এই উপলক্ষে তেওঁ ৰাজহুৱা কাম-কাজ বিভাগৰ অধীনত নিৰ্মিত এখন নতুনকৈ নিৰ্মিত দলং উদ্বোধন কৰে।
মুখ্যমন্ত্রীয়ে স্মৰণ কৰি কয় যে ২০২১ চনৰ ৭ জুনত মুখ্যমন্ত্রী হোৱাৰ পাছত তেওঁৰ প্রথমবাৰ গৰুখুটি ভ্ৰমণ কৰিছিল, তাৰ পাছত ৰাজ্যিক কেবিনেটে বেদখল আঁতৰাই এই কৃষি প্রকল্প আৰম্ভ কৰাৰ সিদ্ধান্ত লয়৷ ১৯৮৩ চনত দৰং-ছিপাঝাৰ অঞ্চলত বেদখল আঁতৰোৱাৰ সময়ত ২৩ জন লোকৰ মৃত্যুৰ কথাও স্মৰণ কৰি তেওঁ কয় যে এই অঞ্চলটো বেদখলমুক্ত হোৱাটো স্থানীয় ৰাইজৰ যুগ যুগীয়া আকাংক্ষা।
বৰ্তমান চৰকাৰৰ দিনত বৰছলা, লামডিং, বুঢ়াপাহাৰ, বটদ্ৰৱা, চাপৰ, পাইকান আদি অঞ্চলত ১.২৯ লাখ বিঘা ভূমি বেদখলৰ পৰা মুক্ত হোৱা বুলি উল্লেখ কৰে। তেওঁ কয় যে ওৰাঙত গঁড় আৰু বাঘৰ উপস্থিতি, লামডিঙৰ অৰণ্যত হাতীৰ উপস্থিতিৰ দৰে পৰিঘটনাসমূহ পৰিৱেশ ভাৰসাম্য পুনৰুদ্ধাৰৰ লক্ষণ। বুঢ়াপাহাৰত হাতী বাঘৰ চলাচলৰ বাবে মুকলি ঠাই, পাইকানত চেগুন আৰু শাল গছৰ পৰিৱেশ ঘূৰাই অনা আৰু বৰছলাৰ সৌৰশক্তিৰ প্ৰকল্প ইয়াৰ উদাহৰণ। লগতে গোলাঘাট জিলাৰ উৰিয়ামঘাটত বেদখল দূৰ কৰাৰ বাবে শীঘ্ৰে ব্যৱস্থা গ্ৰহণ কৰা হ’ব বুলিও ঘোষণা কৰে।
গৰুখুটি প্ৰকল্পৰ অগ্ৰগতিৰ কথা উল্লেখ কৰি মুখ্যমন্ত্ৰীয়ে কয় যে এই প্ৰকল্পৰ পৰা এই বছৰ প্ৰায় ৫.০৫ কোটি টকা আয় হৈছে আৰু বৰ্তমান ইয়াত ৭.৬৪ কোটি টকা জমা আছে। এই প্ৰকল্পৰ অধীনত পশুপালন, বয়ন আৰু অন্যান্য কাম-কাজৰ জৰিয়তে আত্মনিৰ্ভৰশীলতাৰ এক নতুন নিদৰ্শন দাঙি ধৰা হৈছে।
মুখ্যমন্ত্ৰীয়ে কয় যে চৰকাৰে গৰুখুটিত কৃষি বিজ্ঞান প্ৰতিষ্ঠান স্থাপনৰ কথাও চিন্তা কৰিছে, যাতে যুৱক-যুৱতীসকলক জৈৱিক আৰু আধুনিক কৃষি কৌশলৰ প্ৰশিক্ষণ দিব পৰা যায়। প্ৰধানমন্ত্ৰী মৎস্য সম্পদা যোজনাৰ অধীনত ৫৩৩ বিঘা মাটিত সংহত একুৱা পাৰ্ক স্থাপন কৰা হ’ব বুলিও তেওঁ অৱগত কৰে। ইয়াৰ সমান্তৰালকৈ এই প্ৰকল্পৰ সৈতে জড়িত কৃষি সৈনিকসকলৰ সন্মানীয় পদত ২০০০ টকা বৃদ্ধিৰ কথাও ঘোষণা কৰা হয়।
ইয়াৰ পূৰ্বে মুখ্যমন্ত্ৰীয়ে গৰুখুটিৰ বাসুদেৱ আজনামঘৰত প্ৰাৰ্থনা কৰি ৰাজ্যবাসীৰ সমৃদ্ধিৰ বাবে প্ৰাৰ্থনা কৰে। তেওঁ গছপুলি ৰোপণ কাৰ্যসূচীত অংশ গ্ৰহণ কৰাৰ লগতে পথাৰত গুটি ৰোপন কৰাৰ উপৰি কৃষি সৈনিকসকলক যাতায়তৰ সুবিধাৰ্থে চাইকেল বিতৰণ কৰে । লগতে কৰ্তব্যৰত অৱস্থাত ট্ৰেক্টৰ দুৰ্ঘটনাত প্ৰাণ হেৰুৱা পবিত্ৰ ভৰালীৰ পৰিয়াললৈ পাঁচ লাখ টকাৰ সাহায্য প্ৰদান কৰে।
এই কাৰ্যসূচীত গৰুখুটি কৃষি প্ৰকল্পৰ অধ্যক্ষ তথা বিধায়ক পদ্ম হাজৰিকা, বিধায়ক ড° পৰমানন্দ ৰাজবংশী, বসন্ত দাস, অসম মীন উন্নয়ন নিগমৰ প্ৰাক্তন অধ্যক্ষ গুৰুজ্যোতি দাস, সমাজকৰ্মী মুকুন্দ ডেকাকে ধৰি অন্যান্য বিশিষ্ট ব্যক্তিসকল উপস্থিত থাকে।
হিন্দুস্থান সমাচাৰ / মনোজ কুমাৰ শইকীয়া
