গুৱাহাটী, ০১ জানুৱাৰী(হি.স.)। প্রতি মাহৰ প্ৰথম দিনটোৰ পৰম্পৰা অব্যাহত ৰাখি আজিও ভাৰতীয় জনতা পার্টি, অসম প্রদেশৰ মুখপত্র ‘বিজেপি বার্তা’ উন্মোচিত হয়। নতুন বছৰৰ শুভেচ্ছা-বার্তা বিনিময়ৰ সৈতে সংগতি ৰাখি আজি ২০২৬ চনৰ জানুৱাৰী মাহৰ মুখপত্ৰ খন উন্মোচন কৰে ৰাজ্যিক বিজেপিৰ সভাপতি দিলীপ শইকীয়াই।
‘বিজেপি বার্তা’ প্রকাশৰ দহ বছৰ সম্পূৰ্ণ হোৱাৰ আজিৰ দিনটোতে সভাপতি দিলীপ শইকীয়াই মুখপত্র খন উন্মোচন কৰি ইয়াৰ সৈতে জড়িত সকলো কার্যকর্তাকে অভিনন্দন জ্ঞাপন কৰে। আগন্তুক নতুন বছৰটোত সকলোৰে বাবে মংগল কামনা কৰি শইকীয়াই আৰু কয় যে, ২০২৬ বর্ষটো হ’ব নতুন বিজয়ৰ বর্ষ। এই বর্ষটোতে ভাৰতীয় জনতা পার্টিৰ নেতৃত্বত মিত্রজোট চৰকাৰে তৃতীয়বাৰৰ ৰাজ্যৰ শাসন ক্ষমতাত অধিষ্ঠিত হ’ব।
ইয়াৰ বাবে দলৰ সকলো কার্যকর্তাকে সমর্পিত মনোভাৱেৰে নির্বাচনী কামত লাগি যাবলৈ সভাপতি শইকীয়াই আহ্বান জনায়। নির্বাচনী যুঁজখন বিজেপিৰ বাবে কেৱল ক্ষমতা দখলৰ যুঁজ নহয়, এয়া জাতি-সভ্যতা ৰক্ষাৰ যুঁজ বুলিও উল্লেখ কৰি দলৰ এই বিচাৰধাৰা সাধাৰণ ৰাইজৰ মাজলৈ কঢ়িয়াই লৈ যোৱাত ‘বিজেপি বার্তা’ৰ দৰে দলৰ মুখপত্রবো বিশেষ ভূমিকা আছে বুলি শইকীয়াই দৃঢ়তাৰে দোহাৰে। দলৰ ৰাজ্যিক কার্যালয় অটল বিহাৰী বাজপেয়ী ভৱনত পুৱা ১০ বজাৰ পৰা অনুষ্ঠিত আজিৰ এই ‘বিজেপি বার্তা’ উন্মোচনী সভাখনৰ আঁত ধৰে দলৰ অন্যতম ৰাজ্যিক সাধাৰণ সম্পাদক অনুপ বর্মনে। সভাত দলৰ বহুকেই গৰাকী জ্যেষ্ঠ বিষয়ববীয়াৰ লগতে মুখপাত্র তথা মিডিয়া বিভাগৰ সদস্য সকল উপস্থিত থাকে।
হিন্দুস্থান সমাচাৰ / ৰমেন বৰ্মণ
