নতুন দিল্লী, ০৪ ডিচেম্বৰ (হি.স.)। ৰাছিয়াৰ ৰাষ্ট্ৰপতি ভ্লাদিমিৰ পুটিনে বৃহস্পতিবাৰৰ পৰা ভাৰত ভ্ৰমণ কৰিব । ৪-৫ ডিচেম্বৰৰ পৰা আনুষ্ঠানিক ভ্ৰমণলৈ আহিব তেওঁ। প্ৰায় ৩০ ঘণ্টীয়া এই ভ্ৰমণৰ সময়ছোৱাত পুটিনে প্ৰধানমন্ত্ৰী নৰেন্দ্ৰ মোডীৰ সৈতে ২৩ সংখ্যক ভাৰত-ৰাছিয়া দ্বিপাক্ষিক সন্মিলনত অংশগ্ৰহণ কৰিব। চাৰি বছৰৰ ব্যৱধানৰ অন্তত ভাৰত ভ্ৰমণলৈ আহিছে পুটিনে। ২০২১ চনত ভাৰত-ৰাছিয়াৰ বাৰ্ষিক সন্মিলনত অংশগ্ৰহণৰ বাবে তেওঁ নতুন দিল্লী ভ্ৰমণ কৰিছিল।
দুদিনীয়া ভ্ৰমণৰ বাবে অহা ৪ ডিচেম্বৰৰ সন্ধিয়া প্ৰায় ৭ বজাত দিল্লীত উপস্থিত হ’ব ৰাষ্ট্ৰপতি পুটিন। প্ৰধানমন্ত্ৰী মোদীয়ে তেওঁৰ সন্মানত ৭, লোক কল্যাণ মাৰ্গত এক ব্যক্তিগত ভোজৰ আয়োজন কৰিব।
ৰাছিয়াৰ ৰাষ্ট্ৰপতিৰ ভাৰত ভ্ৰমণৰ সময়সূচী অনুসৰি ৫ ডিচেম্বৰত পুটিন আৰু প্ৰধানমন্ত্ৰী মোডীৰ মাজত গুৰুত্বপূৰ্ণ চুক্তিত উপনীত হ’ব। শুকুৰবাৰে পুৱা ৰাষ্ট্ৰপতি ভৱনত আনুষ্ঠানিকভাৱে তিনিওটা সেনাই গাৰ্ড অৱ অনাৰে পুটিনক আদৰণি জনোৱা হ’ব। ইয়াৰ পিছতে মহাত্মা গান্ধীক শ্ৰদ্ধাঞ্জলি জনাবলৈ ৰাজঘাট ভ্ৰমণ কৰিব।
ইয়াৰ পিছতে পুৱা প্ৰায় ১১ বজাত হায়দৰাবাদ হাউছত অনুষ্ঠিত হ’বলগীয়া ২৩ সংখ্যক ভাৰত-ৰাছিয়া সন্মিলনত অংশগ্ৰহণ কৰিব প্ৰধানমন্ত্ৰী মোডী আৰু ৰাছিয়াৰ ৰাষ্ট্ৰপতি পুটিনে। প্ৰতিৰক্ষা, শক্তি, বাণিজ্য, প্ৰযুক্তি, মহাকাশ, কৌশলগত সহযোগিতাৰ দৰে ক্ষেত্ৰত গুৰুত্বপূৰ্ণ চুক্তি হোৱাৰ আশা কৰা হৈছে। বৈঠকৰ পিছতে দুয়োগৰাকী নেতাই যৌথ বিবৃতি প্ৰকাশ কৰিব।
উল্লেখযোগ্য যে ভাৰত আৰু ৰাছিয়াৰ মাজত এই পৰ্যন্ত ২২টা শীৰ্ষ সন্মিলন অনুষ্ঠিত হৈছে। যোৱা বছৰ প্ৰধানমন্ত্ৰী মোদীয়ে মস্কো ভ্ৰমণ কৰাৰ বিপৰীতে ২০২১ চনত শীৰ্ষ সন্মিলনৰ বাবে পুটিনে শেষবাৰৰ বাবে ভাৰত ভ্ৰমণ কৰিছিল। বিয়লি ৪ বজাত ভাৰত মাণ্ডপামত ভাৰত-ৰাছিয়া ব্যৱসায়িক মঞ্চত সম্বোধন কৰিব দুয়োগৰাকী নেতাই। ব্যৱসায়িক প্ৰতিনিধিৰ সৈতে সাক্ষাৎ কৰিব। ইয়াৰ পিছতে সন্ধিয়া প্ৰায় ৭ বজাত ৰাছিয়াৰ ৰাষ্ট্ৰপতি পুটিনৰ সন্মানত ৰাষ্ট্ৰপতি দ্ৰৌপদী মুৰ্মুৱে ৰাজকীয় ভোজৰ আয়োজন কৰিব। আনহাতে ৫ ডিচেম্বৰৰ নিশা ৰাছিয়ালৈ ৰাওনা হ’ব ৰাষ্ট্ৰপতি পুটিন।
हिन्दुस्थान समाचार / অৰৱিন্দ
