পেহেলগামত সংঘটিত সন্ত্ৰাসবাদী আক্ৰমণৰ পিছত ভাৰতত সকলো পাকিস্তানী শিল্পীৰ ছ’চিয়েল মিডিয়া একাউণ্টত নিষেধাজ্ঞা আৰোপ কৰা হয়। কিছুদিন পূৰ্বে এই একাউণ্টৰ পৰা নিষেধাজ্ঞা উঠাই লোৱাৰ ফলত দেশবাসীৰ মাজত ক্ষোভৰ সৃষ্টি হৈছিল। অল ইণ্ডিয়া চিনে ৱৰ্কাৰছ এছ’চিয়েশ্যনেও এই সিদ্ধান্তক সমালোচনা কৰি প্ৰধানমন্ত্ৰী নৰেন্দ্ৰ মোডীলৈ এখন পত্ৰ লিখিছিল। এতিয়া আকৌ এবাৰ পাকিস্তানী শিল্পীৰ ছ’চিয়েল মিডিয়া একাউণ্ট ভাৰতত নিষিদ্ধ কৰা হৈছে। এই সিদ্ধান্তৰ পিছত ছ’চিয়েল মিডিয়াত ধাৰাবাহিক প্ৰতিক্ৰিয়া অব্যাহত আছে।
খবৰ অনুসৰি, জৰুৰী পৰ্যালোচনা বৈঠকৰ অন্তত ভাৰত চৰকাৰে পুনৰবাৰ কঠোৰ পদক্ষেপ গ্ৰহণ কৰি ভাৰতত ১৮ হাজাৰৰো অধিক পাকিস্তানী ছ’চিয়েল মিডিয়া একাউণ্ট নিষিদ্ধ কৰিছে। শেহতীয়াকৈ মাউৰা হোকানে, হানিয়া আমিৰ, ফাৱাদ খানৰ দৰে বহু পাকিস্তানী শিল্পী আৰু ক্ৰিকেটাৰৰ ছ’চিয়েল মিডিয়া প্ৰফাইল ভাৰতীয় ব্যৱহাৰকাৰীৰ দৃষ্টিগোচৰ হৈছিল যদিও এতিয়া চৰকাৰৰ নতুন কাৰ্যকলাপৰ অধীনত ভাৰতত পুনৰ এই সকলোৰে ইনষ্টাগ্ৰাম একাউণ্ট ব্লক কৰা হৈছে।
যেতিয়া কোনো ভাৰতীয় ব্যৱহাৰকাৰীয়ে পাকিস্তানী শিল্পীৰ ছ’চিয়েল মিডিয়া একাউণ্ট খুলিবলৈ চেষ্টা কৰে, তেতিয়া পৰ্দাত এই বাৰ্তাটো ওলায়, এই একাউণ্টটো ভাৰতত উপলব্ধ নহয়। ইয়াৰ কাৰণ হ’ল আমি আইনী অনুৰোধৰ পিছত এই কন্টেন্টটো ব্লক কৰিছো। মন কৰিবলগীয়া যে ২২ এপ্ৰিলত পহলগামত সংঘটিত সন্ত্ৰাসবাদী আক্ৰমণৰ পিছত ভাৰত আৰু পাকিস্তানৰ সম্পৰ্কত উত্তেজনা যথেষ্ট বৃদ্ধি পাইছে। এই ৰাজনৈতিক আৰু কূটনৈতিক সংঘৰ্ষৰ প্ৰভাৱ এতিয়া প্ৰত্যক্ষভাৱে মনোৰঞ্জন জগততো অনুভৱ কৰা হৈছে।
হিন্দুস্থান সমাচাৰ / মনোজ কুমাৰ শইকীয়া
