গুৱাহাটী, ১৬ নৱেম্বৰ (হি.স.)। মহাপুৰুষ শ্ৰীমন্ত শংকৰদেৱৰ অপূৰ্ব সৃষ্টি, এক কালজয়ী সম্পদ ১৫শ শতিকাৰ বৃন্দাবনী বস্ত্ৰ অসমলৈ অনাৰ যাৱতীয় ব্যৱস্থা গ্ৰহণৰ বাবে মুখ্যমন্ত্ৰী ড° হিমন্ত বিশ্ব শৰ্মা আজি দেওবাৰে লণ্ডনত উপস্থিত হ’ব। অসমৰ চহকী ইতিহাস সমৃদ্ধ বৃন্দাবনী বস্ত্ৰ অসমলৈ প্ৰদৰ্শনৰ বাবে অনা সন্দৰ্ভত আলোচনাৰ বাবে শনিবাৰে লণ্ডনলৈ ৰাওনা হৈছিল মুখ্যমন্ত্ৰী গৰাকী। আজি লণ্ডনৰ সংগ্ৰহালয়ৰ কর্তৃপক্ষ আৰু অসম চৰকাৰৰ মাজত এই সন্দর্ভত এখন বুজাবুজিৰ চুক্তিও স্বাক্ষৰ হোৱাৰ কথা মুখ্যমন্ত্রীয়ে সামাজিক মাধ্যমযোগে প্রকাশ কৰিছে।
বহু প্ৰজন্মই এই বস্ত্ৰভাগ চাবলৈ নোপোৱা এই বস্ত্ৰ কালক্ৰমত অসমৰ পৰা তিব্বত হৈ লণ্ডন আৰু পেৰিছৰ দৰে স্থানলৈ গৈছিল। বৰ্তমান ই লণ্ডনৰ মিউজিয়ামত সংৰক্ষিত হৈ আছে। মহাপুৰুষ শংকৰদেৱৰ অমৰ সৃষ্টি বৃন্দাবনী বস্ত্ৰৰ কিছু অংশ আছে লণ্ডন মিউজিয়ামত। পেৰিছ মিউজিয়ামতো আছে বৃন্দাবনী বস্ত্ৰৰ আন কিছু অংশ। ভক্তি মনোভাৱেৰে মহাপুৰুষ শ্ৰীমন্ত শংকৰদেৱৰ এই পবিত্ৰ বস্ত্ৰশিল্পই বৈষ্ণৱ সংস্কৃতিক নিজৰ ঐশ্বৰিক কাৰুকাৰ্য্যৰ জৰিয়তে সজীৱ কৰি তোলে।
মুখ্যমন্ত্ৰীয়ে আজিৰ দিনটোত লণ্ডন মিউজিয়াম কৰ্তৃপক্ষৰ সৈতে আলোচনাত মিলিত হোৱাৰ কথা আছে আৰু সম্ভৱতঃ এখন বুজাবুজিৰ চুক্তি স্বাক্ষৰিত হ’ব। আজি লণ্ডনৰ সংগ্ৰহালয়ৰ কর্তৃপক্ষ আৰু অসম চৰকাৰৰ মাজত এই সন্দর্ভত এখন বুজাবুজিৰ চুক্তিও স্বাক্ষৰ হ’ব বুলি মুখ্যমন্ত্রীয়ে সামাজিক মাধ্যমযোগে প্রকাশ কৰিছে। জে এছ ডব্লিউ (জেএছডব্লিউ) গ্ৰুপৰ সজ্জন জিন্দালে এই ক্ষেত্ৰত আগভাগ লৈছে আৰু মিউজিয়াম কৰ্তৃপক্ষই বিচৰা ধৰণে সকলো সুবিধা থকা এক অত্যাধুনিক সংগ্ৰহালয় গুৱাহাটীৰ খানাপাৰাত নিৰ্মাণ কৰি দিব। চুক্তিমতে, ২০২৭ চনত বৃন্দাবনী বস্ত্ৰ অসমলৈ অনাৰ লক্ষ্য স্থিৰ কৰা হৈছে, যাতে অসমবাসীৰ লগতে সমগ্ৰ ভাৰতবাসীয়ে এই ঐতিহাসিক সম্পদ দৰ্শন কৰি অসমীয়া সভ্যতাৰ চহকী ইতিহাসৰ বিষয়ে জানিব পাৰে।
হিন্দুস্থান সমাচাৰ / মনোজ কুমাৰ শইকীয়া
