নতুন দিল্লী, ২১ জুলাই (হি.স.)। স্বাস্থ্যজনিত কাৰণত সোমবাৰে উপ-ৰাষ্ট্ৰপতি জগদীপ ধনখৰে তাৎক্ষণিকভাৱে কাৰ্যকৰী হোৱাকৈ পদৰ পৰা পদত্যাগ কৰে। ৰাষ্ট্ৰপতি দ্ৰৌপদী মুৰ্মুলৈ প্ৰেৰণ কৰা এখন পত্ৰত তেওঁ কয় যে চিকিৎসাৰ পৰামৰ্শৰ ভিত্তিত তেওঁ এই সিদ্ধান্ত গ্ৰহণ কৰিছে।
পদত্যাগ পত্ৰত ধনখৰে ৰাষ্ট্ৰপতিগৰাকীৰ প্ৰতি কৃতজ্ঞতা প্ৰকাশ কৰাৰ লগতে তেওঁৰ কাৰ্যকালত তেওঁৰ সৈতে থকা সহযোগিতা আৰু আন্তৰিক সম্পৰ্কৰ শলাগ লয়। লগতে প্ৰধানমন্ত্ৰী আৰু মন্ত্ৰী পৰিষদক ধন্যবাদ জ্ঞাপন কৰি কয় যে এই কাৰ্যকালত তেওঁ বহু কথা শিকিবলৈ পাইছিল। ধনখৰে কয় যে সাংসদসকলৰ পৰা লাভ কৰা মৰম, বিশ্বাস আৰু সন্মান তেওঁৰ স্মৃতিত সংৰক্ষণ কৰি ৰাখিব। তেওঁ উপ-ৰাষ্ট্ৰপতি হিচাপে কাৰ্যনিৰ্বাহ কৰাৰ সময়ত লাভ কৰা অভিজ্ঞতা আৰু জ্ঞানক অমূল্য বুলি অভিহিত কৰে।
ভাৰতৰ অৰ্থনৈতিক অগ্ৰগতি আৰু ঐতিহাসিক পৰিৱৰ্তনৰ সাক্ষী হোৱাটো তেওঁৰ বাবে গৌৰৱৰ বিষয় বুলিও তেওঁ কয়। তেওঁ নিজৰ পত্ৰত ভাৰতৰ বিশ্বব্যাপী খ্যাতি আৰু সাফল্যৰ প্ৰতি গৌৰৱ প্ৰকাশ কৰাৰ লগতে দেশৰ উজ্জ্বল ভৱিষ্যতৰ প্ৰতি অদম্য বিশ্বাস প্ৰকাশ কৰে।
উল্লেখযোগ্য যে জগদীপ ধনখৰে ২০২২ চনৰ ১১ আগষ্টত ভাৰতৰ চতুৰ্দশ উপ-ৰাষ্ট্ৰপতিৰ দায়িত্ব গ্ৰহণ কৰিছিল। সংবিধানৰ ৬৭(ক) অনুচ্ছেদ অনুসৰি পদত্যাগ কৰিছে। উপ-ৰাষ্ট্ৰপতিৰ দায়িত্ব লোৱাৰ পূৰ্বে তেওঁ পশ্চিম বংগৰ ৰাজ্যপাল আৰু ৰাজস্থানৰ সাংসদ হৈ আহিছে। উপ-ৰাষ্ট্ৰপতি হিচাপে তেওঁ ৰাজ্যসভাৰ অধ্যক্ষৰ ভূমিকাও পালন কৰি আছিল।
হিন্দুস্থান সমাচাৰ / মনোজ কুমাৰ শইকীয়া
