নতুন দিল্লী, ১৭ ছেপ্টেম্বৰ (হি.স.)। প্ৰধানমন্ত্ৰী নৰেন্দ্ৰ মোদীৰ ৭৫ সংখ্যক জন্মদিনত নতুন দিল্লীৰ ত্যাগৰাজ ষ্টেডিয়ামত সেৱা পষেক (সেৱা পখোৱাৰা)ৰ অংশ হিচাপে দিল্লীৰ বাবে ১৬০০ কোটি টকাৰ বিভিন্ন উন্নয়নমূলক প্ৰকল্পৰ উদ্বোধন আৰু আধাৰশিলা স্থাপন কৰে কেন্দ্ৰীয় গৃহমন্ত্ৰী অমিত শ্বাহে। এই উপলক্ষে দিল্লীৰ মুখ্যমন্ত্রী ৰেখা গুপ্তা, দিল্লী চৰকাৰৰ মন্ত্রীসকল, আৰু বিজেপিৰ নেতা-কর্মীসকল উপস্থিত থাকে ৷
অনুষ্ঠানত ভাষণ দি অমিত শ্বাহে কংগ্ৰেছ নেতা ৰাহুল গান্ধীৰ ভোটাৰ অধিকাৰ যাত্ৰাক অনুপ্ৰৱেশকাৰীক বচাওক যাত্ৰা বুলি অভিহিত কৰে। শ্বাহে কয় যে ৰাহুল গান্ধীয়ে ভাৰতীয় ভোটাৰক বিশ্বাস নকৰে আৰু অনুপ্ৰৱেশকাৰীৰ ওপৰত নিৰ্ভৰ কৰি নিৰ্বাচনত জয়ী হ’ব বিচাৰে। ভোটাৰ তালিকা পুনৰীক্ষণ কাৰ্যসূচীক বিজেপিয়ে সম্পূৰ্ণ সমৰ্থন কৰে বুলিও মন্তব্য কৰে।
তেওঁ কয় যে প্ৰধানমন্ত্ৰী নৰেন্দ্ৰ মোডীৰ নেতৃত্বত দেশৰ বিকাশ দ্ৰুতগতিত হৈছে। শ্বাহে কয় যে মোডী চৰকাৰে দিল্লীৰ কল্যাণৰ বাবে ধাৰাবাহিকভাৱে কাম কৰি আহিছে যদিও আম আদমী পাৰ্টি চৰকাৰে দিল্লীত কেন্দ্ৰীয় কল্যাণমূলক আঁচনি ৰূপায়ণ কৰা নাই। দিল্লীত বিজেপি চৰকাৰ ক্ষমতালৈ অহাৰ পিছৰে পৰা মুখ্যমন্ত্ৰী ৰেখা গুপ্তাই অহৰহ কল্যাণমূলক আঁচনি ৰূপায়ণ কৰি আহিছে। দিল্লী চৰকাৰে আয়ুষ্মান ভাৰত আঁচনি ৰূপায়ণ কৰি দিল্লীবাসীক এক উল্লেখযোগ্য উপহাৰ দিছে।
শ্বাহে কয় যে দিল্লী চৰকাৰে দিল্লীৰ জাবৰৰ পাহাৰবোৰ নাইকিয়া কৰাৰ বাবে অহৰহ কাম কৰি আছে আৰু ক্ৰমান্বয়ে সেইবোৰ আঁতৰাই আছে। আৱৰ্জনা পৰা বিদ্যুৎ উৎপাদন কৰি চৰকাৰে বিদ্যুতৰ প্ৰয়োজনীয়তা পূৰণ কৰি জাবৰৰ পাহাৰ নিৰ্মূল কৰি আছে। জি এছ টি সংস্কাৰৰ পিছতে দিল্লীবাসীক এই দীপাৱলীত থলুৱা সামগ্ৰী ক্ৰয় কৰিবলৈ আহ্বান জনায়।
हिन्दुस्थान समाचार / অৰৱিন্দ
