গোলাঘাট, ১২ আগষ্ট (হি.স.)। গোলাঘাট জিলাৰ দেৰগাঁৱৰ লাচিত বৰফুকন পুলিচ একাডেমী (এল বি পি এ)ত ৪৩ সপ্তাহৰ মৌলিক প্ৰশিক্ষণ পাঠ্যক্ৰমত গোৱা আৰক্ষীৰ ১ম, ২য় আৰু ৩য় ইণ্ডিয়া ৰিজাৰ্ভ বেটেলিয়নৰ মুঠ ৭০০ গৰাকী নিযুক্তিপ্ৰাপ্ত জোৱানে সফলতাৰে সমাপ্ত কৰে। মঙলবাৰে একাডেমী চৌহদত আয়োজন কৰা হয় এক গ্ৰেণ্ড পাছিং আউট পেৰেডৰ।
অনুষ্ঠানত গোৱাৰ মুখ্যমন্ত্রী ড০ প্রমোদ সাৱন্ত, অসমৰ মুখ্যমন্ত্রী ড০ হিমন্ত বিশ্ব শর্মা, দুয়োখন ৰাজ্যৰ জ্যেষ্ঠ আৰক্ষী বিষয়া আৰু নিযুক্তিপ্ৰাপ্তসকলৰ পৰিয়ালৰ সদস্যসকল উপস্থিত থাকে৷ ২০২৪ চনৰ ৪ অক্টোবৰত বিশেষ ৰে’লযোগে এল বি পি এত উপস্থিত হোৱা এই নিযুক্তিপ্ৰাপ্তসকলে শাৰীৰিক ফিটনেছ, মানসিক শক্তি, ফিল্ড টেকটিক আৰু অস্ত্ৰ পৰিচালনাৰ দৰে কঠোৰ প্ৰশিক্ষণ গ্ৰহণ কৰে। এই বেটচটো ঐতিহাসিক আছিল কাৰণ অসম, মণিপুৰ আৰু গোৱা আৰক্ষীৰ নিযুক্তিপ্ৰাপ্তসকলে একেলগে প্ৰশিক্ষণ গ্ৰহণ কৰিছিল। ইয়াৰ ফলত আন্তঃৰাজ্যিক সম্প্ৰীতি আৰু পেছাদাৰী বিনিময়ৰ প্ৰসাৰ ঘটিছিল।
পৰিয়াল আৰু বিষয়াৰ উপস্থিতিত অনুষ্ঠিত পেৰেডত নিযুক্তিপ্ৰাপ্তসকলে অনুশাসন আৰু নিখুঁততা প্ৰদৰ্শন কৰে। পেৰেডত জ্যেষ্ঠ বিষয়াসকলে পৰ্যালোচনা কৰে আৰু অনুষ্ঠানত শপত গ্ৰহণ, মাৰ্চ পাষ্ট, পুৰস্কাৰ বিতৰণ আৰু ‘পেন্থাৰছ অন হুইলছ’ ইউনিটৰ বিশেষ প্ৰদৰ্শনী অনুষ্ঠিত হয়। কিনকিনীয়া বৰষুণৰ মাজতো নিযুক্তি প্ৰাপ্তসকলৰ মনোবল তথা উৎসাহ লক্ষণীয় আছিল ।
এই উপলক্ষে গোৱাৰ মুখ্যমন্ত্ৰীয়ে নিযুক্তিপ্ৰাপ্তসকলৰ নিষ্ঠা আৰু প্ৰশিক্ষণৰ সময়ছোৱাত তেওঁলোকৰ ৰূপান্তৰক প্ৰশংসা কৰে। তেওঁ অনুশাসন, সততা আৰু জনসেৱাক আৰক্ষী সেৱাৰ মৌলিক স্তম্ভ বুলি অভিহিত কৰে। তেওঁ অসমৰ মুখ্যমন্ত্ৰীৰ সহযোগিতাৰ শলাগ লয়। লাচিত বৰফুকন পুলিচ একাডেমী দেশৰ অন্যতম আগশাৰীৰ আৰক্ষী প্ৰশিক্ষণ কেন্দ্ৰ। ইয়াৰ পৰা এতিয়ালৈকে হাজাৰ হাজাৰ নিযুক্তিপ্ৰাপ্তক প্ৰশিক্ষণ দিয়া হৈছে।
हिन्दुस्थान समाचार / Manoj Kumar Saikia
