নতুন দিল্লী, ২৫ ডিচেম্বৰ (হি.স.)। দেশৰ প্ৰাক্তন প্ৰধানমন্ত্ৰী তথা ভাৰতৰত্ন অটল বিহাৰী বাজপেয়ীৰ ১০১ তম জন্ম জয়ন্তী উপলক্ষে ৰাষ্ট্ৰপতি দ্ৰৌপদী মুৰ্মু, উপ-ৰাষ্ট্ৰপতি চি.পি. ৰাধাকৃষ্ণন, প্ৰধানমন্ত্ৰী নৰেন্দ্ৰ মোডী আদিয়ে আজি পুৱা নতুন দিল্লীৰ বিজয় ঘাটত থকা সদৈৱ অটল স্মৃতিসৌধত উপস্থিত হৈ পুস্প অৰ্পন কৰি শ্ৰদ্ধাঞ্জলি জনায়। লোকসভাৰ অধ্যক্ষ ওম বিৰলা, গৃহমন্ত্ৰী অমিত শ্বাহ, কেন্দ্ৰীয় মন্ত্ৰী জে পি নাড্ডা, বিজেপিৰ ৰাষ্ট্ৰীয় কাৰ্যকৰী সভাপতি নীতিন নৱিন, আৰু দিল্লীৰ মুখ্যমন্ত্ৰী ৰেখা গুপ্তাইও প্ৰয়াত বিজেপিৰ প্ৰয়াত বাজপেয়ীক শ্ৰদ্ধাঞ্জলি জ্ঞাপন কৰে।
উপ-ৰাষ্ট্ৰপতি চি.পি. ৰাধাকৃষ্ণনে এই উপলক্ষে কয় যে অটল বিহাৰী বাজপেয়ী আছিল এজন ৰাষ্ট্ৰনেতা, কবি আৰু একত্ৰীকৰণৰ প্ৰতীক। তেওঁৰ শব্দই ৰাষ্ট্ৰক অনুপ্ৰাণিত কৰিছিল আৰু তেওঁৰ দৃষ্টিভংগীয়ে ভৱিষ্যতক গঢ় দিছিল। তেওঁ কয় যে অটলজীৰ চিৰস্থায়ী উত্তৰাধিকাৰ হৈছে আলোচনা, মৰ্যাদা আৰু নিষ্ঠাৰ জৰিয়তে সামাজিক পৰিৱৰ্তনৰ পাঠ।
প্ৰধানমন্ত্ৰী নৰেন্দ্ৰ মোদীয়ে এক্সত কয় যে অটল বিহাৰী বাজপেয়ীয়ে সুশাসন আৰু ৰাষ্ট্ৰ-নিৰ্মাণৰ বাবে নিজৰ জীৱন উৎসৰ্গা কৰিছিল। অটল জী আছিল এজন মেধাৱী বক্তা আৰু এজন শক্তিশালী কবি। তেওঁৰ ব্যক্তিত্ব আৰু নেতৃত্বই দেশৰ সৰ্বাংগীন উন্নয়নৰ বাট মুকলি কৰি দিলে।
কেন্দ্ৰীয় গৃহমন্ত্ৰী অমিত শ্বাহে এক্সত কয় যে বিজেপি প্ৰতিষ্ঠা কৰি অটল জীয়ে ৰাষ্ট্ৰীয় স্বাৰ্থ আৰু সাংস্কৃতিক ৰাষ্ট্ৰীয়তাবাদক অগ্ৰাধিকাৰ দিয়া বিকল্প আগবঢ়াইছে। অটল জীৰ নেতৃত্বত এন ডি এ চৰকাৰে ঐতিহ্য আৰু বিজ্ঞানক একত্ৰিত কৰা আৰ্হি আগবঢ়াইছিল আৰু পাৰমাণৱিক শক্তিৰে চলা ভাৰত তেওঁৰ দৃঢ় নীতিৰ ফল।
বিজেপিৰ ৰাষ্ট্ৰীয় কাৰ্যকৰী সভাপতি নীতিন নবিনে এক্সত কয় যে অটলজী আছিল মূল্যবোধভিত্তিক ৰাজনীতি আৰু মতাদৰ্শগত দায়বদ্ধতাৰ এক স্তম্ভ। অটল জীয়ে গণতন্ত্ৰক আলোচনাৰ সংস্কৃতি প্ৰদান কৰিছিল আৰু জনসেৱাক আদৰ্শগত ৰূপ দিছিল। তেওঁৰ জীৱন জাতিটোৰ সৰ্বাংগীন উন্নয়নৰ প্ৰেৰণা। নীতিন নবিনেও দেশবাসীক সুশাসন দিৱসৰ শুভেচ্ছা জনায়।
हिन्दुस्थान समाचार / অৰৱিন্দ
