২০ সহস্ৰাধিক কাৰ্যকৰ্তাই আদৰিলে বিজেপিৰ ৰাষ্ট্ৰীয় কাৰ্যকৰী সভাপতি নীতিন নবীনক
গুৱাহাটী, ২৬ ডিচেম্বৰ (হি.স.)। পূৰ্বৰ কংগ্ৰেছ চৰকাৰৰ দিনত অসমলৈ অবৈধ বিদেশী অহাটো সহজ ঘটনা আছিল, কিন্তু বৰ্তমান সেয়া অসম্ভৱ বুলি মন্তব্য কৰিছে বিজেপিৰ ৰাষ্ট্ৰীয় কাৰ্যকৰী সভাপতি নীতিন নবীনে। গুৱাহাটীৰ শ্ৰীমন্ত শংকৰদেৱ আন্তঃজাৰ্তিক প্ৰেক্ষাগৃহত আজি অনুষ্ঠিত হোৱা ৰাজ্যিক কাৰ্যনিৰ্বাহক সভাৰ উদ্বোধনী সত্ৰত কাৰ্যকৰ্তাসকলৰ সন্মুখত বক্তব্য ৰাখি এই মন্তব্য কৰে৷
বিজেপিৰ ৰাজ্যিক মুখপাত্ৰ জয়ন্ত কুমাৰ গোস্বামীয়ে প্ৰেৰণ কৰা এক প্ৰেছ বিজ্ঞপ্তি যোগে এই কথা সদৰি কৰি কয় যে, ৰাজ্যিক সভাপতি দিলীপ শইকীয়াৰ আদৰণি ভাষণেৰে আৰম্ভ হোৱা কাৰ্যনিৰ্বাহকৰ প্ৰথম দিনাৰ প্ৰথম সত্ৰত ৰাষ্ট্ৰীয় কাৰ্যকৰী সভাপতি গৰাকীয়ে ২০০৯ চনৰ পৰা যুৱ মৰ্চাৰ সাংগঠনিক কাম-কাজৰ জৰিয়তে অসমৰ লগত তেওঁৰ এক নিবিৰ সম্পৰ্ক থকাৰ কথা উল্লেখ কৰি সেই সময়ৰ অসমৰ ৰাজনৈতিক পৰিস্থিতি আৰু আজিৰ ৰাজনৈতিক পৰিস্থিতিৰ ব্যাপক সলনি হৈছে বুলি উল্লেখ কৰে৷ আনহাতে কাৰ্যকৰী সভাপতি গৰাকীয়ে ২০১৬ চনৰ পৰা বৰ্তমানলৈকে অসমত বিজেপি চৰকাৰে বিকাশৰ ক্ষেত্ৰত এক আমোল পৰিৱৰ্তন হৈছে বুলি মন্তব্য কৰে৷
উদ্বোধনী সত্ৰত মুখ্যমন্ত্ৰী ড॰ হিমন্ত বিশ্ব শৰ্মা, কেন্দ্ৰীয় মন্ত্ৰী সৰ্বানন্দ সোণোৱাল, ৰাষ্ট্ৰীয় উপাধ্যক্ষ বৈজন্ত জয় পাণ্ডা, কেন্দ্ৰীয় মন্ত্ৰী পবিত্ৰ মাৰ্ঘেৰিটা, ৰাষ্ট্ৰীয় সাংগঠনিক সাধাৰণ সম্পাদক বি এল সন্তোষ আৰু ৰাজ্যিক সাংগাঠনিক সাধাৰণ সম্পাদক ৰবীন্দ্ৰ ৰাজু উপস্থিত থাকে৷ উল্লেখ্য যে, সভাখনৰ পূৰ্বে ভাৰতীয় জনতা পাৰ্টিৰ নৱ নিযুক্ত ৰাষ্ট্ৰীয় কাৰ্যকৰী সভাপতি তথা দেশৰ জনপ্ৰিয় যুৱ নেতাজনক ২০ সহস্ৰাধিক কাৰ্যকৰ্তাই লোকপ্ৰিয় গোপীনাথ বৰদলৈ বিমান বন্দৰৰ পৰা শংকৰদেৱ কলাক্ষেত্ৰলৈ শুভাযাত্ৰা কৰি শ্ৰীমন্ত শংকৰদেৱ গুৰুজনা তথা মা কামাখ্যাৰ ভূমি অসমলৈ উষ্ম আদৰণি জনায়৷ দুদিনীয়া কাৰ্যসূচীৰে আজিৰে পৰা অনুষ্ঠিত হোৱা ৰাজ্যিক কাৰ্যনিৰ্বাহক সভাখন কালিলৈ দিনৰ ২ বজালৈকে অনুষ্ঠিত হ’ব৷
হিন্দুস্থান সমাচাৰ / আলোক চক্ৰৱৰ্তী
