নতুন দিল্লী, ২৩ নৱেম্বৰ (হি.স.)। ভাৰতৰ মুখ্য ন্যায়াধীশ হিচাপে অহা ২৪ নৱেম্বৰত শপত গ্ৰহণ কৰিব ন্যায়াধীশ সূৰ্যকান্তই। ৰাষ্ট্ৰপতি ভৱনত অনুষ্ঠিত হ’বলগীয়া শপত গ্ৰহণ অনুষ্ঠানত ব্ৰাজিলকে ধৰি সাতখন দেশৰ মুখ্য ন্যায়াধীশ আৰু উচ্চতম ন্যায়ালয়ৰ ন্যায়াধীশসকলে অংশগ্ৰহণ কৰিব।
এই সমাৰোহত ব্ৰাজিলৰ উপৰিও ভূটান, কেনিয়া, মালয়েছিয়া, মৰিচাছ, নেপাল আৰু শ্ৰীলংকাৰ মুখ্য ন্যায়াধীশসকলৰ লগতে তেওঁলোকৰ পৰিয়ালেও অংশগ্ৰহণ কৰিব। মুখ্য ন্যায়াধীশৰ শপতগ্ৰহণ অনুষ্ঠানত ভাৰতীয় ন্যায়পালিকাৰ ইতিহাসত প্ৰথমবাৰলৈ আন দেশৰ ইমান বৃহৎ সংখ্যক ন্যায়িক প্ৰতিনিধি দল উপস্থিত থাকিব।
ন্যায়াধীশ সূৰ্যকান্ত ভাৰতৰ ৫৩ সংখ্যক মুখ্য ন্যায়াধীশ হিচাপে কাৰ্যনিৰ্বাহ কৰিব আৰু ১৪ মাহৰ কাৰ্যকাল কাৰ্যনিৰ্বাহ কৰিব। ২০২৭ চনৰ ৯ ফেব্ৰুৱাৰীত অৱসৰ ল’ব তেওঁ। হাৰিয়ানাৰ প্ৰথমজন মুখ্য ন্যায়াধীশ হ’ব ন্যায়াধীশ সূৰ্য্যকান্ত। বৰ্তমানৰ মুখ্য ন্যায়াধীশ বি আৰ গাভাই আজি অৱসৰ ল’ব। ন্যায়াধীশ বি আৰ গাভাইৰ শেষ কৰ্মদিন আছিল ২২ নৱেম্বৰ।
শপত গ্ৰহণৰ পূৰ্বে সংবাদ মাধ্যমৰ সৈতে হোৱা কথা-বতৰাত ন্যায়াধীশ সূৰ্য্যকান্তই কয় যে তেওঁৰ প্ৰথম অগ্ৰাধিকাৰ হ’ব বিচাৰধীন আদালতৰ গোচৰসমূহৰ সমাধান। তেওঁ লগতে কয় যে উচ্চতম ন্যায়ালয়ৰ ৭৫ বছৰৰ পাছত ইয়াৰ সিদ্ধান্তক আন দেশত নজিৰ হিচাপে উল্লেখ কৰা হয়, যাৰ বাবে আমাক আমাৰ নিজৰ দৰ্শন আৰু ন্যায়বিজ্ঞানৰ প্ৰয়োজন।
সংবাদ মাধ্যমৰ বাতৰিৰ সন্দৰ্ভত ভাষণ দি ন্যায়াধীশ সূৰ্য্যকান্তই কয় যে একাংশ সংবাদ মাধ্যম দায়ী আৰু আদালতৰ প্ৰতিবেদন সঠিকভাৱে প্ৰকাশ কৰে। উচ্চতম ন্যায়ালয় আৰু ন্যায়াধীশৰ ছ’চিয়েল মিডিয়া ট্ৰ’লিঙৰ সন্দৰ্ভত সোধা প্ৰশ্নৰ উত্তৰত তেওঁ কয় যে ছ’চিয়েল মিডিয়াত মানুহে কোৱা কথাৰ ওপৰত তেওঁৰ কোনো প্ৰভাৱ নপৰে। তেওঁ ছ’চিয়েল মিডিয়াক সামাজিক নহয়, অসামাজিক বুলি অভিহিত কৰে।
हिन्दुस्थान समाचार / অৰৱিন্দ
