ইছলামাবাদ, ২৪ ডিচেম্বৰ (হি.স.)। পাকিস্তান তেহৰিক-ই-ইনছাফৰ প্ৰতিষ্ঠাপক তথা ক্ষমতাচ্যুত প্ৰধানমন্ত্ৰী ইমৰাণ খান আৰু তেওঁৰ পত্নী বুছৰা বিবিয়ে আজি আদালতৰ পৰা কিছু সকাহ লাভ কৰে। ফেডাৰেল ৰাজধানী ইছলামবাদৰ স্থানীয় আদালতে ৯ মে’ৰ গোচৰ আৰু আন পাঁচটা গোচৰত ইমৰাণ আৰু বুছৰা বিবিক প্ৰদান কৰা অন্তৱৰ্তীকালীন জামিনৰ ম্যাদ বৃদ্ধি কৰে। পৰৱৰ্তী শুনানিত প্ৰাক্তন প্ৰধানমন্ত্ৰীগৰাকীক ব্যক্তিগতভাৱে বা ভিডিঅ’ লিংকৰ জৰিয়তে হাজিৰ হ’বলৈ নিৰ্দেশ দিয়ে আদালতে। দীৰ্ঘদিন ধৰি ৰাৱালপিণ্ডি কাৰাগাৰত (আদিয়ালা কাৰাগাৰ) বন্দী হৈ থকা খান কেইবাটাও গোচৰত দোষী সাব্যস্ত হৈছে।
গ্ৰেপ্তাৰৰ পূৰ্বে জামিনৰ আবেদনৰ শুনানি গ্ৰহণ কৰে অতিৰিক্ত জিলা আৰু অধিবেশন ন্যায়াধীশ মহম্মদ আফজল মাজোকাই। ইমৰাণ আৰু বুছৰা বিবিৰ হৈ অধিবক্তা ছামছা কায়ানী হাজিৰ হয়। কিন্তু ইমৰাণৰ অনুপস্থিতিৰ বাবে জামিন আৱেদন সন্দৰ্ভত যুক্তি আগবঢ়াব পৰা নাছিল।
ফলত আদালতে অন্তৱৰ্তীকালীন জামিনৰ সময়সীমা বৃদ্ধি কৰি শুনানি ২৭ জানুৱাৰীলৈ স্থগিত ৰাখে।
৯ মে’ৰ গোচৰৰ উপৰিও হত্যাৰ চেষ্টা আৰু কথিত ভুৱা ৰচিদ দাখিল কৰাকে ধৰি অন্যান্য গোচৰো প্ৰাক্তন প্ৰধানমন্ত্ৰীগৰাকীৰ বিৰুদ্ধে পঞ্জীয়ন কৰা হৈছে। বুছৰা বিবিয়েও তোষাখানা উপহাৰৰ সৈতে জড়িত ভুৱা ৰচিদ জমা দিয়াৰ অভিযোগত সুকীয়া গোচৰৰ সন্মুখীন হৈছে। ইফালে আদালতে বুছৰা বিবিৰ গ্ৰেপ্তাৰৰ পূৰ্বে জামিনৰ আবেদনৰ অন্তৱৰ্তীকালীন জামিন আবেদন বৃদ্ধি কৰি গোচৰটো ২৭ জানুৱাৰীলৈ স্থগিত ৰাখে।
ইফালে, পিটিআইৰ অধিবক্তা খালিদ ইউছুফ চৌধুৰীক টোছাখানা গোচৰত শেহতীয়াকৈ দোষী সাব্যস্ত হোৱাৰ বিৰুদ্ধে আবেদন দাখিল কৰাৰ বাবে পাৱাৰ অৱ এটৰ্নী কাগজত স্বাক্ষৰ লোৱাৰ বাবে পুনৰবাৰ ইমৰাণ খানক সাক্ষাৎ কৰাৰ অনুমতি দিবলৈ অস্বীকাৰ কৰে। টোছাখানা-২ গোচৰত দলৰ প্ৰতিষ্ঠাপকৰ আপীল কৰাৰ অধিকাৰত “ইচ্ছাকৃতভাৱে বাধা দিয়া”ক গৰিহণা দিয়ে পিটিআইয়ে। পিটিআইয়ে উল্লেখ কৰিছিল যে পঞ্জাৱ জেল ৰুলছ, ১৯৭৮ৰ ১৭৮ আৰু ১৭৯ নং নিয়মৰ অধীনত প্ৰতিজন কয়দীৰ অধিবক্তাক লগ পোৱাৰ, আইনী নথি-পত্ৰত স্বাক্ষৰ কৰাৰ, আপীল দাখিল কৰাৰ আইনী অধিকাৰ আছে আৰু এই ক্ষেত্ৰত জেল কৰ্তৃপক্ষৰ বাধা সৃষ্টি কৰাৰ কোনো অধিকাৰ নাই। দলটোৱে আৰু অভিযোগ কৰে যে আপীলৰ অধিকাৰ অস্বীকাৰ কৰিলে সংবিধানৰ ১০ক, ৪, ৯, আৰু ২৫ নং অনুচ্ছেদ উলংঘা কৰা হৈছে।
हिन्दुस्थान समाचार / অৰৱিন্দ
